రైతులను తూలనాడి ఎన్టీఆర్ తో పోలికా?

అనేక మార్లు రైతులను పెయిడ్ ఆర్టిస్టులంటూ తూలనాడి అమరావతి జేఏసీ కన్వీనర్ శ్రీనివాసరావు తో లైవ్ లో చెప్పు దెబ్బ తిన్నాడు బీజేపీ నేత విష్ణువర్ధన్ రెడ్డి. చేసిన తప్పు సరిదిద్దు కోకుండా దానికి అంధ్రజ్యోతి ని, అసలు సంబంధం లేని టీడీపీ పార్టీని నిందిస్తుంది బీజేపీ. ఇప్పటికే ఆంధ్రజ్యోతిని బహిష్కరిస్తున్నట్టు ఆ పార్టీ ప్రకటించింది. ఆ తరువాత శ్రీనివాసరావు టీడీపీ నాయకుడు అంటూ ప్రచారం కూడా మొదలుపెట్టారు.

తాజాగా రైతులను తూలనాడి తనని తాను ఎన్టీఆర్ తో పోల్చుకున్నారు విష్ణు. “అధికారం కోసం నాడు వైశ్రాయ్ హోటల్ లో తెలుగు జాతి ముద్దుబడ్డ ఎన్టీఆర్ గారిపై చంద్రబాబు జరిపిన దుశ్చర్యకాండా పరంపర నిన్నటి ఏబీఎన్ చర్చా కార్యక్రమం వరకు మీ కుట్రకోణం కొనసాగుతూనే ఉన్నది. భౌతిక దాడులతో బీజేపీ నాయకుల ఆత్మస్థైర్యాన్ని దెబ్బతీస్తామనుకోవడం మీ మూర్ఖపు ఆలోచన,” అంటూ పెద్ద డైలాగే వేసేశారు.

“ప్రజల తరఫున ప్రశ్నించడంలో నేను వెనకడుగు వేసేదిలేదు, ఇటువంటి దాడులకు మేము బెదిరేది లేదు. అణగారిన వర్గాలను అడ్డుపెట్టుకుని మీ నీచపు రాజకీయ సంస్కృతితో మా గొంతునొక్కడం అసాధ్యం. ప్రజా సమస్యలపై మరింత రెట్టింపుగా ఇకముందూ నా వాణి వినిపిస్తా,” అని కూడా చెప్పుకొచ్చారు. ప్రశ్నించడం, వాణి వినిపించడం అంటే ఏంటో అర్ధం కాలేదు. రైతులను పెయిడ్ ఆర్టిసులంటూ పిలవడం బీజేపీ లైనా? ప్రభుత్వాలను ప్రశ్నించడం మానేసి హక్కుల కోసం పోరాడే రైతులను మాటలు అనడం ఏంటో?

పోనీ ఒక పక్క బీజేపీ అమరావతికి అనుకూలం అంటూ ఇంకో పక్క రైతులను మాటలు అనడం విష్ణు అభిప్రాయమా లేక ఆ పార్టీ అభిప్రాయమా? ప్రజాస్వామ్యంలో భౌతిక దాడులు అందరూ ఖండించాలి అయితే రైతుల పట్ల చులకన భావం.. పరుష పదజాలం వాడి విష్ణు ఆ సానుభూతి లేకుండా చేసుకున్నారు. ఆయనకు వంత పాడి బీజేపీ కూడా అటువంటి పరిస్థితే తెచ్చుకుంటుంది.