జగన్ కేసులను సిబిఐ ఎందుకు సీరియస్ గా తీసుకుంటుంది?

జగన్ అవినీతి కేసులలోని నిందితులు రకరకాల పిటిషన్స్ తో కేసుల విచారణ జరగకుండా ఆపుతున్నారని సిబిఐ ఆరోపిస్తుంది. తమ కేసులన్నిటిని ఒకేసారి విచారించాలని జగన్, విజయసాయిరెడ్డి వేసిన పిటీషన్ పై సిబిఐ కోర్టు నిన్న విచారణ జరిపింది. అయితే ఈ అభ్యర్ధనను సిబిఐ తరపు న్యాయవాది వ్యతిరేకించారు.

నేరాలన్నీ.. విడివిడిగా చేశారని.. నిందితుల్లో కామన్‌గా జగన్మోహన్ రెడ్డి ఉన్నప్పటికీ.. ఇతర నిందితులు మాత్రం వేరని స్పష్టం చేసింది. ఈ తరుణంలో జగన్ కేసులకు ప్రస్తుతం జైలు శిక్ష అనుభవిస్తున్న లాలూ ప్రసాద్ యాదవ్ కేసులకు పోలిక పెట్టింది సిబిఐ. ఆ కేసుల్లోనూ.. విడివిడిగా విచారణ జరిపి… విడివిడిగానే శిక్షలు విధించిన సంగతిని కోర్టు దృష్టికి సీబీఐ తీసుకెళ్లింది.

ఏడేళ్ల నుండి ఈ కేసుల విచారణ మొదలు కానే లేదు. విచారణ ప్రారంభం కాకుండా ఒక పథకం ప్రకారమే డిశ్చార్జ్ పిటిషన్స్ వేసి ఆలస్యం చేస్తున్నారని సిబిఐ ఆరోపణ. గతంలో ఎన్నడూ లేని విధంగా సీబీఐ ఈ కేసులలో తీవ్రంగా స్పందిస్తుంది. మొన్న ఆ మధ్య వ్యక్తిగత హాజరు మినహాయింపు కోరితే జగన్ ఇప్పటికే సాక్షులను ప్రభావితం చేశారు అంటూ వ్యాఖ్యానించింది.

ఇప్పుడు కొత్తగా వేసిన పిటిషన్‌పై.. మరింత ఘాటుగా వాదనలు వినపించింది. విచారణ ఆలస్యం చేయడానికే.. ఇలా చేస్తున్నారని మండిపడింది. దీనితో కేంద్రం జగన్ ను ఈ కేసులతో ఇబ్బంది పెడుతుందా అనే అనుమానాలు రాకమానవు. అధికార పార్టీ నేతలు కూడా ఈ విషయంగా ఒకింత అసహనంగానే ఉన్నారు.