‘ఇంద్ర’ లాంటి డైలాగ్స్ కావాలంట!

ప్రస్తుతం సెట్స్ పైనున్న మెగాస్టార్ “కత్తిలాంటోడు” సినిమాకు రచనా సహకారం, డైలాగ్స్ అందించే బాధ్యతను పరుచూరి బ్రదర్స్ పైన పెట్టారు దర్శకుడు వినాయక్ మరియు మెగాస్టార్. త్రివిక్రమ్ లాంటి షార్ట్ అండ్ సింపుల్ డైలాగ్స్ ను ప్రేక్షకులు ఆశిస్తున్న నేటి తరుణంలో అవుట్ డేటెడ్ పరుచూరి వంటి వారిని ఎంపిక చేయడం మెగా అభిమానులకు కాస్త షాకింగ్ విషయమే అయినా… అంతులేని పరిజ్ఞానం పరుచూరి బ్రదర్స్ సొంతం కావడంతోనే ఈ గురుతర బాధ్యత వారి వద్దకు చేరింది.

అందులోనూ మెగాస్టార్ తో ‘ఇంద్ర’ వంటి పవర్ ఫుల్ డైలాగ్స్ రాసిన ఘనత పరుచూరి సోదరులది. తాజా సినిమాకు కూడా ‘ఇంద్ర’ లాంటి డైలాగ్స్ నే దర్శకుడు వివి వినాయక్ కావాలంటున్నారట. చిరంజీవి డ్యూయల్ రోల్ పోషించనున్న ఈ సినిమాలో ఒక పాత్ర అభిమానులను మెప్పించే విధంగా ఉంటుందని, మరో పాత్ర మెగాస్టార్ మెచ్చిన పాత్ర అని, రైతుల సమస్యల పట్ల లోతుగా అధ్యయనం చేసి మరీ సంభాషణలు రాయాలని సూచించినట్లుగా పరుచూరి వెంకటేశ్వరరావు చెప్పుకొచ్చారు.

అయితే విస్తుగొలిపే మరో విషయం ఏమిటంటే… ఇప్పటివరకు ఈ సినిమా క్లైమాక్స్ పూర్తి కాలేదట. క్లైమాక్స్ పై ఇంకా వర్కౌట్ చేస్తున్నామని, ఓ 70 శాతం పూర్తయినట్లేనని, అయితే చిరంజీవి గారు వంద శాతం సంతృప్తి పడే వరకు తమ ప్రయత్నం ఉంటుందని, నిజానికి ఈ రీమేక్ కాకుండా, ‘ఊయ్యాలవాడ నరసింహారెడ్డి’ సినిమా కధ అద్భుతంగా వచ్చిందని, దానికి కూడా క్లైమాక్స్ నచ్చక మరియు రిస్క్ చేయడం ఇష్టం లేక వదిలిపెట్టేసామని మెగాస్టార్ అభిమతాన్ని వివరించారు.