కేసీఆర్ అతిపెద్ద ప్రాజెక్టుకు జగన్ ముఖ్యఅతిధి

తెలంగాణ ప్రభుత్వం ప్రతిష్టాత్మకంగా నిర్మించిన కాళేశ్వరం ప్రాజెక్టును ఈనెల 21న ప్రారంభించాలని తెలంగాణ ముఖ్యమంత్రి కే చంద్రశేఖరరావు నిర్ణయించారు. ఈ ప్రాజెక్టు ప్రారంభోత్సవానికి ఆంధ్రప్రదేశ్‌ ముఖ్యమంత్రి జగన్‌ మోహన్‌రెడ్డిని ముఖ్య అతిథిగా ఆహ్వానించాలని సీఎం నిర్ణయించినట్లు సమాచారం. త్వరలోనే సీఎం కేసీఆర్‌ స్వయంగా విజయవాడ వెళ్లి జగన్‌ను ఆహ్వానించనున్నారు. జగన్ ముఖ్యమంత్రిగా ఎన్నికైన నాటి నుండీ జగన్ తో మంచి సంబంధాలు నెరుపుతున్నారు.

ఇది ఇలా ఉండగా దాదాపు 151 టీఎంసీల గోదావరి జలాలను ఒడిసిపట్టేందుకు కాళేశ్వరం ప్రాజెక్టు నిర్మాణం చేపట్టారు. దాదాపు 18 లక్షల ఎకరాలకు కొత్తగా నీరు అందించడం మరో 18 లక్షల ఆయకట్టును స్థిరీకరిస్తుంది ఈ ప్రాజెక్టు. ప్రపంచంలోనే అతి పెద్దదైన లిఫ్టు ఇరిగేషన్ ప్రాజెక్టు కాళేశ్వరం. కేసీఆర్ నాయకత్వంలో పూర్తయిన అతిపెద్ద ప్రాజెక్టు ఇదే. కాగా ఇటీవలే సీఎం కేసీఆర్‌ కాళేశ్వరం ప్రాజెక్ట్‌ పరిధిలోని పలు పంపుహౌస్‌లు, బ్యారేజీ పనులను స్వయంగా పర్యవేక్షించారు.

సహజంగా సాగునీటి ప్రాజెక్టుల నిర్మాణాలంటే దశాబ్దాలు పట్టే దేశంలో రెండు మూడేళ్లలోనే కాళేశ్వరం ప్రాజెక్టులో భాగంగా పలు బ్యారేజీలు, అత్యంత క్లిష్టమైన ఎత్తిపోతల నిర్మాణాలు, విద్యుత్‌ సబ్‌ స్టేషన్లను పూర్తిచేస్తుండడంతో ప్రపంచం తెలంగాణ వైపు చూస్తోందని ఆయన ఈ సందర్భంగా వ్యాఖ్యలు చేసిన విషయం తెలిసిందే. అయితే కేసీఆర్ పట్టుదల, అప్పటి ఇరిగేషన్ మంత్రి హరీష్ రావు అకుంఠిత దీక్షతో ఈ ప్రాజెక్టు ఇంత తొందరగా పూర్తి అయ్యింది.