బాలయ్య వారసత్వం మోక్షజ్ఞ చేతుల్లో… అసలు పరీక్ష మొదలు

Mokshagna Film Debut

నందమూరి బాలకృష్ణ అటు సినిమాల్లో, ఇటు రాజకీయాల్లో విజయవంతంగా కొనసాగుతున్నారు. హిందూపురం నుంచి వరుసగా మూడుసార్లు ఎమ్మెల్యేగా గెలిచారు. సీనియర్ హీరోల్లో ఇప్పటికీ బాక్సాఫీస్‌ వద్ద తన బలం చూపిస్తున్నారు. తన ప్రయత్నాలతో ప్రేక్షకుల గౌరవాన్ని కూడా సంపాదిస్తున్నారు.

అయితే బాలకృష్ణకు చాలా కాలంగా ఒక లోటు ఉంది. తన నట వారసత్వాన్ని ముందుకు తీసుకెళ్లేది ఎవరు అనే ప్రశ్న అలాగే ఉండిపోయింది. ఇప్పుడు ఆ కల నెరవేరబోతోంది. ఆయన కుమారుడు మోక్షజ్ఞ సినిమాల్లోకి రావడానికి అంగీకరించినట్లు కనిపిస్తోంది.

కాస్త ఆలస్యమైనా, ఒక తండ్రిగా బాలకృష్ణకు ఇంతకంటే సంతోషకరమైన వార్త ఉండకపోవచ్చు. మొదటి అడుగు పడింది. మోక్షజ్ఞ నటించేందుకు సిద్ధమయ్యారు. కానీ అసలు పరీక్ష ఇప్పుడే మొదలవుతుంది.

స్టార్ కిడ్స్ అరంగేట్రాన్ని సోషల్ మీడియాకు ముందు, సోషల్ మీడియా తర్వాత అని చూడాలి. ఇప్పటి పరిస్థితుల్లో స్టార్ కిడ్‌గా సినిమాల్లోకి రావడం అంత సులభం కాదు. ఫస్ట్ లుక్ నుంచి టీజర్, ట్రైలర్ వరకు ప్రతి విషయాన్నీ సోషల్ మీడియా చాలా కఠినంగా చూస్తోంది. ఏదైనా తేడా వస్తే ఇప్పటికే పేరు తెచ్చుకున్న స్టార్లనే వదలడం లేదు.

అలాంటిది బాలకృష్ణ కుమారుడి అరంగేట్రం అంటే అంచనాలు సహజంగానే ఎక్కువగా ఉంటాయి. పైగా సోషల్ మీడియాలో నందమూరి, మెగా అభిమానుల మధ్య ఉండే పోటీ కూడా మోక్షజ్ఞపై అదనపు ఒత్తిడి పెంచుతుంది.

మోక్షజ్ఞ మొదటి సినిమాతోనే అద్భుతాలు చేయాలని ఎవరూ ఆశించకపోవచ్చు. కానీ స్టార్‌గా కనిపించడం కంటే ముందు, నటుడిగా మెప్పించాలి. ప్రేక్షకులకు నమ్మకం కలిగించాలి. అదే అతని ముందున్న మొదటి సవాల్.

హిట్, ఫ్లాప్ జడ్జిమెంట్ తర్వాత వస్తుంది. సినిమా విడుదలకు ముందే బాలకృష్ణ వారసుడిగా తాను సరైన ఎంపిక అనే నమ్మకాన్ని కలిగించాలి. తెలుగు డిక్షన్, భాషపై పట్టు, పెర్ఫార్మన్స్ విషయంలో బాలకృష్ణకు ప్రత్యేకమైన గుర్తింపు ఉంది. అలాంటి బలమైన బ్రాండ్‌ను ముందుకు తీసుకెళ్లే బాధ్యత ఇప్పుడు మోక్షజ్ఞపై ఉంది.

మోక్షజ్ఞ ఆ అంచనాలను అందుకుంటాడని ఆశిద్దాం. ఒక్కటి మాత్రం ఖాయం. విడుదలకు ముందే ఎక్కువగా చర్చకు వచ్చే సినిమాల్లో మోక్షజ్ఞ అరంగేట్ర చిత్రం ఒకటిగా నిలవబోతోంది.