‘కింగ్’ నాగార్జున షాకింగ్ ‘నిర్ణయం?’

“సోగ్గాడే చిన్నినాయనా” సినిమా విజయంతో సోలో హీరోగా తన సత్తా ఏమిటో మరోసారి నాగ్ నిరూపించుకున్నారు. 2016 సంక్రాంతి విజేతగా అవతరించిన ఈ సినిమా ఇంట, బయట కూడా అదరగొడుతోంది. మార్చిలో తన తదుపరి చిత్రం “ఊపిరి”ని విడుదల చేయడానికి ప్లాన్ చేసిన నాగ్, ఆ తర్వాత రాఘవేంద్రరావుతో ఒక భక్తిరస చిత్రానికి సన్నాహాలు చేస్తున్నారు.

అయితే రాఘవేంద్రరావుతో తీయబోయే చిత్రమే ‘కింగ్’ కెరీర్ కు శుభం కార్డు పడబోయే సినిమా అవనుందని ట్రేడ్ వర్గాల టాక్. తన ఇద్దరు కొడుకుల సినీ భవిష్యత్తు రీత్యా నాగ్ ఈ నిర్ణయం తీసుకున్నారని, స్తబ్దుగా ఉన్న చైతూ కెరీర్ కు ఊపుతేవడం, అలాగే టాలీవుడ్ లో అఖిల్ ను మరో సూపర్ స్టార్ ను చేయాలనే కృతనిశ్చయంతో నాగ్ తన సినీ కెరీర్ ను త్యాగం చేయడానికి సిద్ధమయ్యారని హల్చల్ చేస్తున్న ఈ వార్తలలో వాస్తవమెంత ఉందో తెలియాల్సి ఉంది.

అయితే అక్కినేని అభిమానులు మాత్రం ఇది కేవలం ఒట్టి పుకారుగానే మిగిలిపోవాలని కోరుకుంటున్నారు. ‘మన్మధుడు’గా నాగార్జునకున్న ఇమేజ్ చెక్కు చెదరనిది. అలాంటి నాగ్ వెండితెరకు దూరం కావడం కంటే, బాలీవుడ్ లో అమితాబ్ మాదిరి వైరైటీ రోల్స్ చేయాలని అభిమానులతో పాటు సినీ ప్రేక్షకులు కూడా ఆశిస్తున్నారు.