పవన్ కళ్యాణ్ ‘గెస్ట్ రోల్’ ప్రచారం! నిజమేనా?

అగ్ర హీరోలు పలు సినిమాలలో అతిథి పాత్రలు చేస్తున్నారంటూ కొన్ని వార్తలు ఎప్పుడూ హల్చల్ చేస్తుంటాయి. అయితే అవి ఎంత వరకు వాస్తవాలనేది ఆయా సినిమాలు విడుదలయ్యే వరకు తెలియదు. ఈ ఏడాది విడుదలైన ‘కృష్ణమ్మ కలిపింది ఇద్దరినీ’ చిత్రంలో మహేష్ ఓ అతిథి పాత్ర చేసున్నారంటూ సోషల్ మీడియా చేసిన సందడి తెలిసిందే. మహేష్ బావ సుధీర్ బాబు హీరో ఈ చిత్ర హీరో కావడంతో ఈ పుకార్లు పుట్టుకొచ్చాయని సినిమా విడుదలైన తర్వాత అందరికీ స్పష్టమైంది. తాజాగా పవర్ స్టార్ పవన్ కళ్యాణ్ విషయంలో ఓ సమాచారం సందడి చేస్తోంది.

త్రివిక్రమ్ శ్రీనివాస్ – పవన్ కళ్యాణ్ ల సాన్నిహిత్యం గురించి ప్రత్యేకించి చెప్పాల్సిన పనిలేదు. ఈ అనుబంధంతోనే ప్రస్తుతం త్రివిక్రమ్ దర్శకత్వం వహిస్తున్న “అ… ఆ…” సినిమాలో పవన్ ఓ అతిథి పాత్ర చేయబోతున్నారంటూ ట్రేడ్ వర్గాలలో బలంగా ప్రచారం జరుగుతోంది. ఈ సినిమాలో హీరోగా నటిస్తున్న నితిన్ కూడా పవన్ కు వీరాభిమాని కావడం ఈ వార్తలకు మరింత బలం చేకూరుస్తోంది. ఈ విషయమై పవన్ – త్రివిక్రమ్ ల మధ్య ఇప్పటికే చర్చ జరిగిందని, పవన్ కూడా గ్రీన్ సిగ్నల్ ఇచ్చారని ఈ సమాచారం సారాంశం.

శరవేగంగా షూటింగ్ జరుపుకుంటున్న ఈ సినిమాను ప్రేమికుల దినోత్సవం సందర్భంగా ఫిబ్రవరి 14వ తేదీన “అ… ఆ…”ను ప్రేక్షకుల ముందుకు తీసుకురావడానికి చిత్ర యూనిట్ ప్రయత్నిస్తోందట. ఒకవేళ పవన్ నటిస్తున్న విషయం నిజమైతే నితిన్ పంట పండినట్లే కదా!