రౌండ్ రౌండ్ కు ఇలా దెబ్బ కొట్టింది!

రౌండ్ రౌండ్ కు ఫలితం మారి, ఉత్కంఠభరితంగా సాగుతుందని భావించిన నంద్యాల ఉప ఎన్నికల ఫలితం… ‘బాద్ షా’లో డైలాగ్ మాదిరి ‘వార్ వన్ సైడ్’ అయ్యింది. వరుసగా 15 రౌండ్ల పాటు పూర్తి ఆధిపత్యం ప్రదర్శించిన తెలుగుదేశం పార్టీ, ఒక్క 16వ రౌండ్ లో మాత్రం 654 ఓట్లు వెనుకబడి, మళ్ళీ మిగిలిన మూడు రౌండ్లలోనూ పుంజుకుంది. మొత్తంగా 19 రౌండ్ల లెక్కింపు జరుగగా, 18 రౌండ్లలో తెలుగుదేశం పార్టీ ఆధిపత్యాన్ని ప్రదర్శించగా, ఒకే ఒక్క రౌండ్ లో వైసీపీ అభ్యర్ధి శిల్పా మోహన్ రెడ్డి లీడ్ లోకి వచ్చారు.

ఈ రెండు పార్టీల పరిస్థితి ఇలా ఉంటే, జాతీయ పార్టీ అయిన కాంగ్రెస్ కు చివరి నాలుగు రౌండ్స్ లలో ఒక్క ఓటు కూడా లేకపోవడం విశేషం. ఈ ఫలితంపై మాజీ కాంగ్రెస్ నేత సబ్బం హరి మాట్లాడుతూ… చంద్రబాబు చేపట్టిన అభివృద్ధి కార్యక్రమాలకే ఓటర్లు జై కొట్టారని, జనసేన అధినేత పవన్ కల్యాణ్ వల్ల టీడీపీ అధికారంలోకి రాలేదనే విషయాన్ని చంద్రబాబు నిరూపించారని తెలిపారు. ఇష్టం వచ్చినట్టు మాట్లాడుతూ, నోరు పారేసుకునే జగన్, రోజా లాంటి వాళ్లకు నంద్యాల తీర్పు ఓ గుణపాఠమని ఎద్దేవా చేశారు.