భారతీయుడు 2 ఆగిపోయిందా? ఇదిగో క్లారిటీ

శంకర్ దర్శకత్వంలో రజినీకాంత్, అక్షయ్ కుమార్‌లతో తెరకెక్కించిన ‘రోబో’ సీక్వెల్ 2.0 సినిమా అనుకున్నంత రేంజ్‌లో బాక్సాఫీస్ దగ్గర మెరుపులు మెరిపించలేకపోయింది. ఆ సినిమా తరువాత అదే నిర్మాతలు లైకా ప్రొడక్షన్ తో కమల్ హస్సన్ హీరోగా భారతీయుడు 2 మొదలు పెట్టాడు శంకర్. ఈ చిత్రానికి సంబంధించిన రెండు షెడ్యూళ్లు ఈ మధ్యనే పూర్తి అయ్యాయి. అయితే సినిమా బడ్జెట్ అదుపు తప్పడంతో ఈ సినిమా షూటింగ్‌ను నిలిపివేసినట్టు తమిళ సినీ వర్గాలు చెబుతున్నాయి.

ఈ వార్తలు దావాలనంగా వ్యాపించాకా మొత్తానికి నిర్మాతలు దీని మీద క్లారిటీ ఇచ్చారు. ఈ సినిమా ఆగిపోలేదని ఇప్పటికే రెండు ముఖ్యమైన షెడ్యూల్స్ పూర్తి అయ్యాయని, త్వరలోనే మరో భారీ షెడ్యూల్ ను మొదలు పెట్టనున్నామని లైకాకు సంబంధించిన ప్రతినిధి స్పష్టం చేశారు. ఈ వార్తలలో ఏ మాత్రం నిజం లేదని తెలిపారు. అదే సమయంలో తరువాతి జరగబోతున్న షెడ్యూల్ కు సెట్ వర్కు కూడా జరుగుతుందని తెలిపారు. నిజానికి ఈ సినిమా దిల్ రాజుతో మొదట ఈ సీక్వెల్ ను ప్లాన్ చేసుకున్న సంగతి తెలిసిందే.

మొదట్లోనే శంకర్ వరస ఏంటో అర్ధమయ్యి దిల్ రాజు అంత రిస్క్ చేయాలనీ అనుకోలేదు. దిల్ రాజు తప్పుకున్న తరువాత లైకా వారు ఈ ప్రాజెక్టులోకి వచ్చారు. కాజల్ అగర్వాల్ హీరోయిన్ గా నటిస్తున్న ఈ సినిమాకు అనిరుధ్ సంగీతం అందిస్తున్నాడు. కాజల్ కు కమల్ తో ఇదే మొదటి సినిమా. వచ్చే ఏడాది సంక్రాంతి కానుకగా రిలీజ్ చేయాలని మేకర్స్ ప్లాన్ చేస్తున్నారు. ఇటీవలే రాజకీయాలలోకి వచ్చిన కమల్ హస్సన్ ఇదే తన చివరి సినిమా అని ఇప్పటికే ప్రకటించారు. ఈ క్రమంలో ఈ సినిమాకు ఏం జరగబోతుందో చూడాలి.