పవన్ చేస్తోంది ఒంటరి పోరాటమే!

‘జనసేన’ అధినేతగా పవన్ కళ్యాణ్ రాజకీయ రంగంలో చేస్తోంది ‘ఒంటరి పోరాటమేనని’ కమెడియన్ అలీ అన్నారు. పవర్ స్టార్ కు అత్యంత సన్నిహితుడిగా ప్రతి సినిమాలోనూ పవన్ పక్కన నటించే అలీ, రాజకీయ రంగంలో ఎందుకు పవన్ పక్కన నిలబడలేదు? అన్న ప్రశ్న ఎదురైన సందర్భంలో చెప్పిన జవాబు ఇది. రాజకీయాల్లోకి అడుగుపెడితే, అప్పటివరకు పొగిడిన వాళ్ళే తిడతారని, అలాగే బెదిరింపులను సైతం ఎదుర్కోవాల్సి వస్తుందని, ఈ విషయం తెలిసిన పవన్ తన సన్నిహితులను ఎవరిని పిలవలేదని చెప్పారు.

ఏం జరిగినా… తాను ఒక్కడే పోరాడడానికి పవన్ నిర్ణయించుకున్నాడని, మంచైనా, చెడైనా అన్నీ తానే ఎదుర్కోవడానికి పవన్ సిద్ధమయ్యారని, ఏదైనా అవసరం అనిపించినపుడు చెప్తానని… పవర్ స్టార్ చెప్పినట్లుగా అలీ ఓ తాజా ఇంటర్వ్యూలో చెప్పుకొచ్చారు. తమ మధ్య ఉన్న స్నేహంలో రాజకీయాల గురించి ఎప్పుడు చర్చించలేదని, ఎప్పుడూ సరదా కబుర్లు మాత్రమే ఉంటాయని వారిద్దరి మధ్య సంబంధాలను గురించి తెలిపారు. పవన్ పిలిస్తే కదన రంగంలోకి దూకడానికి తాను రెడీ అన్న సంకేతాలను అయితే అలీ వ్యక్తపరిచారు.