‘జనతా గ్యారేజ్’ రికార్డ్ పై నిర్మాతలు మరో ప్రకటన!

రంజాన్ సందర్భంగా విడుదలైన “జనతా గ్యారేజ్” టీజర్ కు అన్ని వర్గాల నుండి విశేషమైన స్పందన లభించిన విషయం తెలిసిందే. దీంతో గత యూ ట్యూబ్ రికార్డులన్నీ ఒక్క రోజులోనే పటాపంచాలయ్యాయి. అయితే అదే రోజు మోహన్ లాల్ ను ప్రధానంగా చూపిస్తూ ‘జనతా గ్యారేజ్’ సినిమాకు సంబంధించి ఇంకో టీజర్ ను మలయాళ భాషలో విడుదల చేసిన విషయం తెలిసిందే.

తెలుగు సినిమా టీజర్ మాదిరే ‘జనతా గ్యారేజ్’ మలయాళ టీజర్ కూడా యూ ట్యూబ్ రికార్డులను తిరగరాసింది. కేవలం 69 గంటలలో 1 మిలియన్ క్లిక్స్ అందుకున్న మలయాళ భాష టీజర్ గా ‘జనతా గ్యారేజ్’ సరికొత్త రికార్డులను కైవసం చేసుకుంది. దీనికి సంబంధించి నిర్మాతలు మైత్రీ మూవీ మేకర్స్ ‘ఒక పోస్టర్’ను పోస్ట్ చేస్తూ ఒక అధికారిక ప్రకటన కూడా విడుదల చేసింది.

ఈ సంఖ్య అంతకంతకూ పెరుగుతూ పోతుండడంతో అంచనాలు కూడా అదే స్థాయిలో రెట్టింపు అవుతున్నాయి. తెలుగు టీజర్ ఇప్పటికే 3 మిలియన్ క్లిక్స్ ను దాటిపోయి, హాఫ్ బిలియన్ కోసం పరుగులు పెడుతుండగా, మలయాళ టీజర్ 2 మిలియన్ దిశగా అడుగులు వేస్తోంది. మరో పన్నెండు రోజుల్లో ఈ సినిమా ఆడియో విడుదల కానుందన్న సమాచారం జూనియర్ అభిమానులను ఉత్సాహంలో ముంచుతోంది.