పవన్ కళ్యాణ్ ముందుంది నడిపించకపోతే పని కాదు

వైఎస్సార్ కాంగ్రెస్ కు బలంగా మద్దతునిచ్చిన వర్గాలలో యువత ఒకటి. అయితే ఇటీవలే విడుదల చేసిన జాబ్ క్యాలెండర్ కారణంగా ఆ వర్గంలో ప్రభుత్వం మీద ఆగ్రహం పెల్లుబిక్కింది. ఆ అంశం మీద ప్రభుత్వాన్నిఇరుకున పెట్టడానికి టీడీపీ ప్రయత్నించింది.

అయితే మొదట్లో బానే మొదలుపెట్టినా క్షేత్ర స్థాయిలో ఉద్యమాన్ని తీవ్రతరం చెయ్యలేకపోయింది. దానితో ప్రభుత్వం ఆ అంశాన్ని సైడ్ ట్రాక్ చెయ్యగలిగింది. ఈ విషయంలో ఇప్పుడు ఆలస్యంగా మేల్కొని జనసేన హడావిడికి రెడీ అవుతుంది.

దీనిపై ఆ పార్టీ వినతిపత్రాల ఉద్యమం చేయబోతోంది. జాబ్ కాలెండర్ తో ప్రభుత్వం నిరుద్యోగులను మోసం చేసిందని… దీనికి నిరసనగా జనసేన పార్టీ ఈ నెల ఇరవైన ఉపాదికల్పన అధికారులకు వినతిపత్రాలు ఇస్తుందని పవన్ కళ్యాణ్ ప్రకటించారు.

ప్రభుత్వంలో ఉన్న అన్ని ఖాళీలకు ప్రకటన ఇవ్వాలని ఆయన డిమాండ్ చేశారు. లక్షల ఉద్యోగాలు ఇస్తామని హామీ ఇచ్చిన వైఎస్సార్ కాంగ్రెస్ పార్టీ ఆ తర్వాత విస్మరించిందని… ప్రభుత్వం ఇవ్వదు అలాగే ప్రైవేటు పరిశ్రమలలో కూడా ఉద్యోగాలు వచ్చే పరిస్థితి లేదని పవన్ కళ్యాణ్ అన్నారు.

ఆలస్యంగానైనా మేల్కోవడం మంచిదే అయితే జనసేన ఈ విషయంలో ప్రభావం చూపించగలదా అనేది చూడాలి. పవన్ కళ్యాణ్ తన పాటికి తాను షూటింగులు చేసుకుంటూ బిజీగా ఉంటే క్షేత్రస్థాయిలో నాయకులు, క్యాడర్ ఏ మాత్రం ప్రభావం చూపించలేరు. వారు ఏదైనా ప్రయత్నించినా కనీసం మీడియా కవేరేజ్ కూడా ఉండదు. పవన్ కళ్యాణ్ ముందుండి నడిపిస్తేనే ఉపయోగం.