చైతూ ట్రైలర్ తో నాగార్జున ఒప్పుకోవడం లేదు!

అక్కినేని నాగార్జునతో “సోగ్గాడే చిన్ని నాయనా” సినిమాను తెరకెక్కించిన కళ్యాణ్ కృష్ణ రెండవ సినిమా కూడా అన్నపూర్ణ బ్యానర్లో రూపుదిద్దుకుంది. నాగచైతన్య హీరోగా నిర్మాణం జరుపుకున్న ఈ సినిమాను మే 26వ తేదీన విడుదల చేయబోతున్నట్లుగా ధియేటిరికల్ ట్రైలర్ ద్వారా చిత్ర యూనిట్ స్పష్టం చేసింది. రొమాంటిక్ ఎంటర్టైనర్ సినిమాలకు ‘బ్రాండ్ అంబాసిడర్’ అయిన అక్కినేని కాంపౌండ్ రాబోతున్న మరో రొమాంటిక్ సినిమాగా “రారండోయ్ వేడుక చూద్దాం” నిలవనుందన్న అనుభూతిని ట్రైలర్ కలిగించింది.

గడ్డం పెంచిన రఫ్ లుక్ నాగచైతన్య లుక్ అభిమానులను అలరించే విధంగా ఉండగా, చైతూ సరసన నటించిన రకుల్ ప్రీత్ సింగ్ ఈ “రారండోయ్ వేడుక చూద్దాం” సినిమాకు హైలైట్ గా నిలవనుంది. రొటీన్ ‘లవ్ అండ్ ఫ్యామిలీ ఎంటర్టైనర్’గా కనపడుతున్న ఈ ట్రైలర్ లో దేవిశ్రీప్రసాద్ అందించిన బ్యాక్ గ్రౌండ్ సంగీతం ఆకట్టుకోగా, ట్రైలర్ క్లైమాక్స్ లో చైతూ ఇచ్చిన ‘అమ్మాయిలు మనశ్శాంతికి హానికరం’ అనే సందేశం యువతరాన్ని సరిగ్గా కనెక్ట్ అవుతుంది.

ట్రైలర్ చివర్లో నాగచైతన్య పరిగెత్తుకుని వస్తున్న షాట్ ‘సోగ్గాడే చిన్నినాయనా’ సినిమాలో పంచెకట్టులో నాగార్జున క్లైమాక్స్ లో పెరిగెత్తుకుని వచ్చే షాట్ ను గుర్తు చేస్తోంది. అలాగే నాగార్జున నటించిన ‘నిన్నే పెళ్ళాడతా’ సినిమా కంటెంట్ కు దగ్గరగా ఈ “రారండోయ్ వేడుక చూద్దాం” ఉన్నట్లుగా కనపడుతోంది. జగపతిబాబు, సంపత్ లు కూడా సినిమాకున్న ప్లస్ పాయింట్స్ జాబితాలో ఉన్నారు. అయితే చైతూ ఇచ్చిన ‘అమ్మాయిలు మనశ్శాంతికి హానికరం’ సందేశంతో నాగార్జున మాత్రం ఏకీభవించడం లేదు. మరి మీరూ ఓ లుక్కేసి చెప్పండి!