“1 నేనొక్కడినే” కధ సీక్రెట్ చెప్పిన సుకుమార్!

బాక్సాఫీస్ వద్ద పెద్దగా రుచించని “1 నేనొక్కడినే” వంటి సినిమాలకు ఓ ప్రత్యేకమైన అభిమాన గణం ఉంటుంది. సుకుమార్ ప్రతిభకు నిదర్శనంగా నిలిచిన ఈ సినిమాకు సంబంధించి ఓ సీక్రెట్ బయటకు వచ్చింది. ‘దర్శకుడు’ టీజర్ ప్రారంభోత్సవ వేడుకలో ప్రసంగించిన సుకుమార్… “ఈ సినిమాకు దర్శకత్వం వహిస్తున్న జక్కా హరి ప్రసాదే ‘1 నేనొక్కడినే’ కధకు మూల రచయిత అని, ఆయన రాసిన కధనే తాను డవలప్ చేసానని” తెలిపారు.

దీంతో ఆడిటోరియంలో ఉన్న పాత్రికేయ సహోదరులు ఒక్కసారిగా చప్పట్లతో హరిప్రసాద్ కు అభివాదాలు చేసారు. అది “1 నేనొక్కడినే” కధకున్న పవర్. అప్పట్లో నెలకొన్న భారీ అంచనాల రీత్యా ప్రేక్షకులు సరిగా రిసీవ్ చేసుకోలేకపోయారు గానీ, తెలుగు సినీ పరిశ్రమలో విడుదలైన అద్భుతమైన సినిమాలలో ‘1 నేనొక్కడినే’ ఒకటిగా మిగిలిపోయిందని మీడియా వర్గీయుల తాజా స్పందనతో కూడా స్పష్టమైంది.

ఈ సినిమా కోసం ఒక్క రోజు కూడా సెట్స్ కు వెళ్లలేదని, ఇటీవలే సినిమా చూశానని, చాలా బాగా వచ్చిందని, ఒక దర్శకుడు కావాలన్నా వ్యక్తి ప్రేమలో పడి… అదా… ఇదా… అన్న కోణంలో ఈ చిత్ర కధ చాలా తమాషాగా ఉంటుందని సుకుమార్ తెలిపారు. తన సినిమా కధలే తనకు నచ్చవని, అందుకనే ‘కుమారి 21 ఎఫ్’ తర్వాత చాలా కధలు విన్న తర్వాత ఈ కధను ఎంపిక చేసుకుని ముందుకు వస్తున్నామని తనదైన శైలిలో తెలిపారు సుక్కూ.