‘సైరా’లో మరో క్రేజీ బ్యూటీ!

‘బాహుబలి’ తర్వాత అంతటి స్థాయిలో తెరకెక్కనున్న సినిమాగా మెగాస్టార్ చిరంజీవి “సైరా నరసింహారెడ్డి” ట్రేడ్ వర్గాల్లో ప్రాధాన్యతను సంతరించుకుంది. ఈ సినిమాకు ఎంపిక చేసిన కాస్టింగ్ ఇప్పటికే దిమ్మతిరిగే రేంజ్ లో ఉండగా, దీనికి మరింత మంది తోడు కానున్నారని తెలుస్తోంది. ‘అరుంధతి, రుద్రమదేవి, బాహుబలి’ వంటి సినిమాలతో విశేషమైన కీర్తి ప్రతిష్టతలు తెచ్చుకున్న అనుష్క కూడా ఈ సినిమాలో నటిస్తోందన్న సమాచారం హల్చల్ చేస్తోంది.

హార్రర్, ఫాంటసీ, చారిత్రాత్మకం… ఇలా ఏ తరహా ప్రేస్టేజీయస్ ప్రాజెక్ట్ అయినా గానీ అనుష్క లేకుండా అలాంటి సినిమాలను ఊహించుకోలేనంతగా తెలుగు ప్రేక్షకులపై ప్రభావితం చూపింది. అందులో భాగంగానే ‘సైరా నరసింహారెడ్డి’ సినిమాలో ఓ కీలకపాత్రలో అనుష్క కనిపించనుందని తెలుస్తోంది. ఇప్పటికే ప్రధాన భామగా నయనతార ఎంపిక కాగా, మరో రెండు పాత్రల కోసం చేస్తున్న అన్వేషణలో ఓ పాత్రలో అనుష్క మెరవనుందని లేటెస్ట్ టాక్.

చరిత్ర ప్రకారం ‘సైరా నరసింహారెడ్డి’కి ముగ్గురు భార్యలని, అందులో రెండు అధికారికం కాగా, మరొకటి అనధికారికంగా ఉంటుందని, ఇటీవల సోషల్ మీడియాలో చక్కర్లు కొట్టిన విషయం. తాజాగా అనుష్క ఎంపిక ఈ అంశాన్ని మరింత బలపరిచేదిగా ఉంది. అందాల బొమ్మ అనుష్క కూడా ‘సైరా’కు తోడయితే, ఇప్పటికే ఉన్న క్రేజ్ మరింత పెరిగినట్లే కదా! ఇప్పటివరకు మెగాస్టార్ సరసన ‘స్టాలిన్’ సినిమాలో ఒకే ఒక్క ఐటెం సాంగ్ లో మాత్రమే కనిపించింది అనుష్క.