కం-బ్యాక్ అత్యవసరం..!

టీ20 క్రికెట్‌లో భారత జట్టు ఇటీవల ఎదుర్కొన్న పరాజయాలు అభిమానులకు తీవ్ర నిరాశే మిగిల్చింది. ఐర్లాండ్ చేతిలో వైట్‌వాష్, ఆ తర్వాత ఇంగ్లండ్ చేతిలో క్లీన్‌స్వీప్ కావడం భారత టీ20 చరిత్రలో అరుదైన పరిస్థితిగా నిలిచింది. వరుస మ్యాచ్లలో జట్టు అన్ని విభాగాల్లోనూ ఆశించిన స్థాయిలో రాణించలేకపోయింది. దీంతో భారత జట్టు ప్రదర్శనపై అనేక ప్రశ్నలు తలెత్తుతున్నాయి.

భారత క్రికెట్ చరిత్రలో టీ20 ఫార్మాట్‌లో ఇంత క్లిష్టమైన పరిస్థితి మునుపెన్నడూ చూసింది లేదు. బ్యాటింగ్‌లో నిలకడ లేకపోవడం, బౌలింగ్‌లో వికెట్లు తీయలేకపోవడం జట్టును తీవ్రంగా దెబ్బతీశాయి. కీలక సమయాల్లో క్యాచ్ లను నేలపాలు చేసి మ్యాచ్‌ లను చేతులారా చేజార్చుకున్నారు. అందుకే వరుస పరాజయాలు తప్పలేదు.

ఈ రెండు సిరీస్‌ లలో స్పష్టంగా కనిపించిన ప్రధాన లోపం అనుభవజ్ఞుల కొరత. ఒత్తిడి సమయంలో జట్టును ముందుండి నడిపించే సీనియర్ ఆటగాళ్లు లేకపోవడం ప్రభావం చూపింది. యువ ఆటగాళ్లు ప్రతిభ కనబరిచినప్పటికీ, కీలక ఘట్టాల్లో మ్యాచ్‌ను ముగించే సామర్ధ్యం ఈ కుర్ర జట్టులో తక్కువయింది. అదే భారత జట్టుకు పెద్ద సమస్యగా మారింది.

అయితే ఇప్పుడు పరిస్థితి పూర్తిగా భిన్నంగా ఉండబోనుంది. ఇంగ్లండ్‌తో జరిగే వన్డే సిరీస్‌కు భారత జట్టు పూర్తి స్థాయి సీనియర్ ఆటగాళ్లతో బరిలోకి దిగనుంది. అనుభవం, నైపుణ్యం కలిగిన క్రికెటర్లతో జట్టు మరింత బలంగా కనిపిస్తోంది. దీంతో అభిమానుల్లో మళ్లీ ఆశలు చిగురిస్తున్నాయి.

ప్రత్యేకంగా విరాట్ కోహ్లీ, రోహిత్ శర్మ వంటి దిగ్గజాల రాక జట్టుకు భారీ బలం కానుంది. ఇంగ్లండ్ పరిస్థితుల్లో వీరిద్దరికీ అద్భుతమైన రికార్డులు ఉన్నాయి. స్వింగ్, సీమ్‌కు అనుగుణంగా తమ ఆటను మార్చుకునే సామర్థ్యం వారిలో ఉంది. అందుకే వన్డే సిరీస్‌లో వీరి పాత్ర ఎంతో కీలకంగా మారనుంది.

వన్డే ఫార్మాట్‌లో భారత్‌కు అనుభవం మాత్రమే కాదు, స్థిరత్వం కూడా అదనపు బలం. మధ్య ఓవర్లను నియంత్రించడం, ఇన్నింగ్స్‌ను నిర్మించడం, చివర్లో వేగం పెంచడం వంటి అంశాల్లో సీనియర్ ఆటగాళ్లు రాహుల్, అక్షర్ వంటి ప్రత్యేక నైపుణ్యం కలిగినవారున్నారు. అదే టీ20 సిరీస్‌లో లోటుగా కనిపించింది. ఇప్పుడు ఆ బలమే భారత జట్టుకు ఆయుధంగా మారే అవకాశం ఉంది.

ఇంగ్లండ్ సొంతగడ్డపై ఆడటం ఎప్పుడూ సవాలుతో కూడుకున్నదే. అక్కడి వాతావరణం, పిచ్ పరిస్థితులు ప్రత్యర్థి జట్లకు పరీక్ష పెడతాయి. అయినప్పటికీ అనుభవజ్ఞులైన భారత ఆటగాళ్లు గతంలో విజయాలను నమోదు చేశారు. ఆ అనుభవం ఈసారి కూడా జట్టుకు ఉపయోగపడుతుందనే నమ్మకం అభిమానుల్లో ఉంది.

టీ20లో ఎదురైన ఘోర పరాజయాల నుంచి భారత జట్టు ఎంత త్వరగా కోలుకుంటుందనేదే ఇప్పుడు అందరి ప్రశ్న. వన్డే సిరీస్‌లో విజయంతో విమర్శలకు సమాధానం చెప్పే అవకాశం జట్టుకు ఉంది. సీనియర్ ఆటగాళ్లు తమ అనుభవాన్ని మైదానంలో చూపగలిగితే భారత్ మళ్లీ విజయాల బాట పట్టే అవకాశాలు మెరుగ్గా కనిపిస్తున్నాయి. మరి ఇంగ్లండ్ గడ్డపై భారత జట్టు ఘనంగా పునరాగమనం చేస్తుందా లేదా అనేది రాబోయే వన్డే సిరీస్‌లో తేలనుంది..!