ఈ పద్ధతి మంచిది కాదన్న సురేష్ బాబు!

ఈ నెల 11న నితిన్‌ నటించిన ‘లై’, బోయపాటి శ్రీను దర్శకత్వం వహించిన ‘జయ జానకి నాయక’, రానా హీరోగా తయారైన ‘నేనే రాజు నేనే మంత్రి’ సినిమాలు విడుదలవనున్న నేపథ్యంలో నిర్మాత దగ్గుబాటి సురేశ్ బాబు స్పందించారు. ఓ మోస్తరు సినిమాలు ఇలా ఒకే రోజున విడుదల కావడం మంచిది కాదని అభిప్రాయపడ్డ ఆయన, థియేటర్ల విషయంలో సమస్యలు ఉన్నాయని, ఎవరూ వెనక్కి తగ్గడం లేదని అన్నారు. ఈ తరహా పోటీ వల్ల పరిశ్రమకు నష్టం వాటిల్లే ప్రమాదముందని తెలిపారు.

ఇక రానా నటించిన చిత్రం ఓ క్లాసికల్ మూవీలా అనిపించిందని, కొన్ని సన్నివేశాల్లో తనకు కళ్లవెంట నీళ్లొచ్చాయని అన్నారు. లక్ష్య సాధనలో దారి తప్పిన యువకుడు, తన తప్పును ఏ విధంగా సరిదిద్దుకున్నాడన్న కథాంశంతో చిత్రం తయారైందని తెలిపారు. తమిళంలో అజిత్ కొత్త చిత్రం విడుదల 11వ తేదీన ఉంటే, తాను ఈ చిత్రాన్ని రెండు వారాల పాటు వాయిదా వేసి ఉండేవాడినని సురేశ్ బాబు అన్నారు. చిత్రం విడుదలకు ముందే సేఫ్ జోన్ లోకి వచ్చేసిందని తెలిపారు.