“గౌతమీపుత్ర శాతకర్ణి” ట్రైలర్ లీక్స్… షాట్స్ అదిరిపోలా..!

నందమూరి నటసింహం బాలకృష్ణ 100వ సినిమా ట్రైలర్ ను ఏపీ, తెలంగాణా వ్యాప్తంగా ఎంపిక చేసిన 100 ధియేటర్లలో విడుదల చేయనున్న విషయం తెలిసిందే. నందమూరి అభిమానులు భారీ అంచనాలు పెట్టుకున్న ఈ ట్రైలర్ విడుదల కావడానికి ఇంకా ఒక రోజు సమయం మాత్రమే ఉంది. అయితే చిత్ర యూనిట్ వర్గాలు మరియు చిత్ర ప్రమోషన్ దారులు ఈ ట్రైలర్ ను ఇప్పటికే చూసి ఉన్నారు. దీంతో పలు స్క్రీన్ షాట్స్ సోషల్ మీడియాలో ప్రత్యక్షమయ్యాయి.

అభిమానులను ఊరించే విధంగా ఈ రెండు షాట్స్ అదిరిపోయే రేంజ్ లో ఉండడంతో ఫ్యాన్స్ లో కొత్త ఉత్సాహం, ఉత్తేజం ఉరకలేస్తోంది. రాజ్యానికి సంబంధించిన సెట్టింగ్ ఒక షాట్ కాగా, పోరాట సన్నివేశంలో భాగంగా గుర్రాలు పరుగులెత్తే షాట్ మరొకటి. దీంతో “గౌతమీపుత్ర శాతకర్ణి” ట్రైలర్ కన్నుల విందుగా ఉంటుందన్న సంకేతాలు ఈ షాట్స్ కలిగిస్తున్నాయి. అంతేకాదు, తక్కువ బడ్జెట్ లోనే గ్రాండ్ లుక్ ను తీసుకురావడంలో దర్శకుడు క్రిష్ సూపర్ సక్సెస్ అయ్యారన్న నమ్మకాన్ని కూడా వ్యక్తమయ్యేలా చేస్తున్నాయి.

16వ తేదీన సాయంత్రం 5.15 నిముషాలకు విడుదల కానున్న ట్రైలర్ ముచ్చట్లు ఇలా ఉంటే, ఆడియో వేడుక ఈ నెల 26వ తేదీన తిరుపతిలోని ఎస్వీ గ్రౌండ్స్ లో అత్యంత వైభవంగా విడుదల కానుంది. ఇక, సినిమాను సంక్రాంతి కానుకగా ప్రేక్షకుల ముందుకు తీసుకురానున్నారు. భారీ స్థాయిలో విడుదల కానున్న ట్రైలర్ గనుక అంచనాలను అందుకోగలిగితే… సినిమా సక్సెస్ లో సగం వంతు పూర్తయినట్లే భావించవచ్చు. దీంతో అందరి చూపులు “గౌతమీపుత్ర శాతకర్ణి” వైపుకే..!