ఇలా… ‘ఈ నగరానికి ఏమైంది? ఓ వైపు నుసి, మరో వైపు పొగ…’ అంటూ ప్రదర్శితమయ్యే పొగాకు హెచ్చరికల పట్ల ప్రేక్షకులు పెదవి విరుస్తున్న వైనం తెలిసిందే. ఎప్పుడో ఒకసారి సినిమాను చూసే ప్రేక్షకులు ఈ యాడ్ ని భరించగలరేమో గానీ, నిత్యం ధియేటర్ల చుట్టూ తిరిగే సినిమా పిచ్చోళ్ళకు మాత్రం ఇదొక హింస మాదిరిగానే ఫీల్ అవుతున్నారు. అయితే తాజాగా దీనిపై కేంద్ర ప్రభుత్వం శ్యామ్ బెనగళ్ నేతృత్వంలో ఓ కమిటీ అధ్యయనం చేయాలని నియమించింది. తాజాగా ఆ కమిటీ నివేదిక సినిమా ప్రేక్షకులకు అనుకూలంగా రావడం మరింత సంతోష దాయకమైన విషయం.
సినిమాకు ముందు పొగాకు యాడ్ దృశ్యాలు ప్రదర్శించవద్దని, దీని స్థానంలో ఓ ఫోటోను చూపిస్తే సరిపోతుందని ‘సినిమా సంస్కరణల’పై నియమించిన శ్యామ్ కమిటీ పేర్కొంది. కుటుంబంతో కలసి సరదాగా ఓ సినిమాకు వెళ్లిన వేళ, చిత్రం ప్రారంభ సమయంలో, ఆపై విశ్రాంతి తరువాత వచ్చే పొగాకు వ్యతిరేక షార్ట్ ఫిల్మ్ లు, చిత్రంలో మద్యపాన, ధూమపాన సన్నివేశాల వేళ, డిస్టర్బ్ చేసే హెచ్చరికలను తొలగించాలని ఈ కమిటీ మోడీ సర్కారుకు సిఫార్సు చేసింది.
ఆరోగ్య శాఖ ఆమోదించిన ఓ ఫోటోను చూపుతూ, కొన్ని సెకన్ల పాటు బ్యాక్ గ్రౌండ్ ఆడియో వినిపిస్తే సరిపోతుందని చెప్పింది. దీన్ని అన్ని భాషల్లోనూ తయారు చేసి సినిమా ప్రారంభ సమయంలో వినిపిస్తే చాలని పేర్కొంది. అలా అంగీకరించని పక్షంలో తమ చిత్రంలోని ఓ నటుడితో పొగాకుకు వ్యతిరేకంగా ఓ చిన్న షార్ట్ ఫిలిం తీసి దాన్ని మాత్రమే చిత్రం ముందు ప్రదర్శించే వెసులుబాటును నిర్మాతకు కల్పించాలని కోరింది. దీని వల్ల ప్రేక్షకులు కూడా కొంత రిలీఫ్ గా ఫీలవుతారని పేర్కొంది.
చిత్రంలో ప్రతి స్మోకింగ్ లేదా డ్రింకింగ్ సీన్ ముందు వచ్చే హెచ్చరికలు, సినిమాలో లీనమైపోయిన వారిని ఆ అనుభూతి నుంచి దూరం చేస్తున్నాయని అభిప్రాయపడ్డ కమిటీ, ఈ తరహా సీన్ల ముందు హెచ్చరికను తీసివేయాలని సూచించింది. అలాగే సినిమాల్లో జంతువుల వాడకం తప్పనిసరని, ఎంపిక చేసిన జంతువులను వాడుకునే వెసులుబాటును నిర్మాతలకు దగ్గర చేయాలని కూడా సిఫార్సు చేసింది. ఈ మేరకు యానిమల్ వెల్ఫేర్ బోర్డ్ ఆఫ్ ఇండియా నుంచి అనుమతి తీసుకుని, కేర్ టేకర్లను నియమించుకుని తర్ఫీదు పొందిన జంతువులను షూటింగుకు వాడుకునేందుకు అంగీకరించాలని సూచించింది.
కాగా, ఆరోగ్య శాఖ ఆదేశాలతో తప్పనిసరి పరిస్థితుల్లో పొగాకు ప్రకటనలను చూపుతూ, చిత్రం నిడివి పెరిగి, ఆర్థిక భారం మోయాల్సి వస్తోందని వాపోతున్న నిర్మాతలకు బెనగళ్ సిఫార్సులు కొంత ఆనందాన్ని కలిగించేవేనని సినీ పండితులు వ్యాఖ్యానించారు. మోడీ క్యాబినెట్ ఈ సిఫార్సులను ఆమోదిస్తే, సిల్వర్ స్క్రీన్ పై పొగాకు వ్యతిరేక ప్రకటనల హడావుడి తగ్గి, ప్రేక్షకులకు కొంత ఉపశమనం లభించినట్లయ్యింది.
The Supreme Court has suggested involving Indian cricketer Virat Kohli in a public awareness campaign…
23 ఏళ్లుగా వివాదంలో ఉన్న మియాపూర్ భూముల పై నేడు సుప్రీం కోర్ట్ ఇచ్చిన తీర్పుతో తెలంగాణ ప్రభుత్వానికి భారీ…
