“ఖైదీ నంబర్ 150” టీజర్ టాక్ లీక్!

మెగాస్టార్ రీ ఎంట్రీ ఇవ్వబోతున్న “ఖైదీ నంబర్ 150” సినిమాకు సంబంధించిన తొలి టీజర్ మరికొద్ది గంటల్లో ప్రేక్షకుల ముందుకు రానుంది. అయితే సినీ ఇండస్ట్రీకి సంబంధించిన జనాలు ఇప్పటికే ఈ టీజర్ ను వీక్షించడం… వారి అనుభూతులను సోషల్ మీడియాలో పంచుకోవడంతో… మెగా అభిమానుల ఆసక్తి మరింతగా రెట్టింపయ్యింది. గురువారం సాయంత్రం 6 గంటలకు సోషల్ మీడియా ద్వారా విడుదల కానున్న ఈ టీజర్ నిడివి 35-40 సెకన్ల పాటు ఉండనుందని టాక్.

అలాగే, మెగాస్టార్ నోటి వెంట మాస్ డైలాగ్స్ ను వినాలనుకుంటున్న మెగా అభిమానులకు, సినీ ప్రేక్షకులకు ఓ డైలాగ్ తో తన ‘టేస్ట్’ రేంజ్ ఏంటో రుచి చూపించబోతున్నారని తెలుస్తోంది. ఒక్క మాటలో చెప్పాలంటే… మెగా ఫ్యాన్స్ కు కన్నులవిందుగా ఈ టీజర్ ఉండనుందని ప్రత్యేకంగా చెప్పాల్సిన పని లేదేమో! ఈ చిన్న టీజర్ తో ఇప్పటికే ఉన్న అంచనాలు మరికొన్ని మెట్లను ఎక్కడం ఖాయమనేది అసలు టాక్. ఈ సమాచారంతో సోషల్ మీడియాలో ‘ధృవ’ రిలీజ్ తో పాటు “ఖైదీ నంబర్ 150” టీజర్ హంగామా కూడా ఎక్కువగా ఉంది.

అన్నట్టు గురువారం నాడు విడుదల కాబోతున్న ఈ టీజర్, శుక్రవారం నుండి “ధృవ” ప్రదర్శితం కానున్న ధియేటర్లలో ప్రదర్శించబోతున్నారు. దీంతో ‘ధృవ’ సినిమా కలెక్షన్స్ పై “ఖైదీ నంబర్ 150” టీజర్ ప్రభావం కూడా ఖచ్చితంగా ఉంటుందని చెప్పవచ్చు. మెగాస్టార్ ను చాలాకాలం తర్వాత వెండితెరపై చూడాలన్న ఆకాంక్ష ఈ 9వ తేదీతో తీరిపోనుంది. ‘బ్రూస్ లీ’ అనేది ఓ చేదు జ్ఞాపకం కావడంతో, ఆ సినిమాను, అందులో మెగాస్టార్ రీ ఎంట్రీని మెగా ఫ్యాన్స్ పూర్తిగా మరిచిపోయారని చెప్పవచ్చు.