‘జనతా గ్యారేజ్’పై కొరటాల శివ సంచలన కామెంట్స్!

ఒక సినిమా విడుదలకు ముందు ఒక మాట, ధియేటర్లలో ఆడుతున్నపుడు మరో మాట, ఇక అంతా సర్దుకున్నాక మరో మాట మాట్లాడడం సినీ జనాలకు బాగా అలవాటైన విషయమే. 2016 సంవత్సరానికి గానూ టాప్ హిట్ గా నిలిచిన జూనియర్ ఎన్టీఆర్ “జనతా గ్యారేజ్” విషయంలోనూ దర్శకుడు కొరటాల శివ ఇలాంటి సంచలన వ్యాఖ్యలకే తెరలేపారు. కమెడియన్ శ్రీనివాసరెడ్డి హీరోగా నటించిన ‘జయమ్ము నిశ్చయమ్మురా’ ప్రమోషన్ సందర్భంగా తన సినిమాపై కీలక వ్యాఖ్యలు చేసారు కొరటాల.

“ఒక సినిమా విజయవంతం కావాలంటే అన్ని డిపార్ట్మెంట్స్ పర్ ఫెక్ట్ గా ఉండాలని, ‘జయమ్ము నిశ్చయమ్మురా’ సినిమా విషయంలో తనకు అది కనపడుతోందని, అది ఖచ్చితంగా విజయవంతం అవుతుందని” అన్న కొరటాల, తన ‘జనతా గ్యారేజ్’ సినిమాలో కొన్ని లోపాలు ఉన్నాయని, అన్ని క్రాఫ్ట్స్ సరిగా కుదరలేదని అన్నారు. ‘జయమ్ము నిశ్చయమ్మురా’ సినిమా గురించి చెప్తూ చెప్తూ… తన సినిమాలోని లోపాలను ఒప్పుకున్న ఇదే కొరటాల, సినిమా రిలీజ్ అయిన సమయంలో మాత్రం రివ్యూలపై పెదవి విరిచిన విషయం తెలిసిందే.

తానూ దర్శకత్వం వహించిన మూడు సినిమాలలో “జనతా గ్యారేజ్” బెస్ట్ అని అప్పుడు చెప్పిన కొరటాల, అందులో బొక్కలున్నాయని ఇప్పుడు చెప్పారు. అయితే హీరోల, దర్శకుల మాటలను గుడ్డిగా నమ్మే అభిమానులకు మాత్రం ప్రస్తుతం కొరటాల చేసిన వ్యాఖ్యలు రుచించడం లేదు. ముఖ్యంగా రాక రాక ఒక బ్లాక్ బస్టర్ అందుకున్న ‘యంగ్ టైగర్’ ఫ్యాన్స్ మాత్రం మండిపడుతున్నారు. అయితే “జయమ్ము నిశ్చయమ్మురా” మాత్రం అద్భుతంగా ఉందని స్పష్టత ఇచ్చారు కొరటాల.