కర్నూల్ లో వైకాపా పాచిక పారలేదు

కర్నూలు జిల్లా స్థానిక ఎమ్మెల్సీ ఎన్నిక ఏకగ్రీవమైంది. ఇద్దరు స్వతంత్ర అభ్యర్థులు తమ నామినేషన్లను ఉపసంహరించుకున్నారు. బరిలో తెదేపా అభ్యర్థి కేఈ ప్రభాకర్‌ ఒక్కరే మిగలడంతో ఆయన ఏకగ్రీవంగా ఎన్నికయ్యారు. ఓటమి దాదాపుగా ఖరారు కావడంతో వైకాపా ఈ ఎన్నికలో అభ్యర్థిని కూడా నిలబెట్టలేదు.

అయితే బరిలో నిలిచిన స్వతంత్ర అభ్యర్థులకు మద్దత్తు ఇచ్చి టీడీపీని ఇరుకున పెడదామని ఒకదశలో ఆ పార్టీ ప్రయత్నించింది. అయితే అధికారపక్షం బరిలోకి దిగి వారితో విరమింపచేసింది. టీడీపీ చేతిలో ప్రజాస్వామ్యాన్ని ఖూనీ అవ్వనివ్వకుండా, తమ పార్టీ ఎంపీలు, జడ్పీటీసీలు ఎక్కువగా ఉన్నప్పటికీ పోటీ చేయడంలేదని వైసీపీ స్పష్టం చేసింది.

శిల్పా చక్రపాణి రెడ్డి రాజీనామాతో ఈ సీట్ ఖాళీ అయ్యింది. నంద్యాల ఉపఎన్నిక సందర్భంగా తన అన్నకు మద్దతుగా రాజీనామా చేసి వైకాపాలో జాయిన్ అయ్యారు శిల్పా చక్రపాణి రెడ్డి. అయితే ఓటమి తథ్యం కావడంతో ఉపఎన్నికలో పోటీ చెయ్యడానికి కూడా నిరాకరించారు ఆయన.