మరో భారీ చిత్రం చెయ్యడానికి కసరత్తు చేస్తున్న రానా?

భారతీయ సినిమా కనీవినీ ఎరుగని విపత్తుని కరోనా రూపంలో ఎదురుకుంటుంది. ముందుముందు పరిస్థితి ఎలా ఉండబోతుంది అనే దాని మీద ఎవరికీ ఐడియా కూడా రావడం లేదు. షూటింగులు చేసుకోవచ్చు అని ప్రభుత్వం పర్మిషన్ ఇచ్చినా చేసుకోలేని పరిస్థితి. థియేటర్లు ఓపెన్ చేసినా ప్రేక్షకులను రప్పించడం తేలికైన విషయం కాదు అని నిర్మాతలు అంటున్నారు.

రాబోయే రోజుల్లో ఈ సంక్షోభాన్ని అధిగమించడానికి మరియు ప్రేక్షకులను థియేటర్లకు తీసుకురావడానికి పరిశ్రమ స్పెక్టకిల్ చిత్రాలపై దృష్టి పెట్టాలని రానా దగ్గుబాటి ఒక ఇంటర్వ్యూలో వెల్లడించారు. రానా ఇప్పటికే బాహుబలితో కలిసి భారీ స్పెక్టకిల్ చిత్రానికి ప్రయత్నించారు.

“స్పెక్టకిల్ ఫిల్మ్ లు చెయ్యడం మాత్రమే ఈ సంక్షోభాన్ని అధిగమించడానికి ఏకైక మార్గం. నేను ప్రస్తుతం అడవి బ్యాక్ డ్రాప్ లో ఉండే అరణ్య చిత్రం చేస్తున్నాను. ఆ తరువాత విరాటపర్వం ఉంది, ఇది పీరియడ్ చిత్రం. అలాగే మేము హిరణ్య వంటి స్పెక్టాకిల్ చిత్రం కోసం పని చేస్తున్నాము. స్క్రిప్ట్ దశలో వర్తమాన్ అనే మరొక స్క్రిప్ట్ ఉంది” అని రానా ఒక ఇంటర్వ్యూలో చెప్పారు.

రానా వర్తమన్ వివరాలను వెల్లడించలేదు కానీ జైనమతం యొక్క 24 వ తీర్థంకరుడు వర్తమాన్ మహావీర బయోపిక్ అని అభిమానులు అనుకుంటున్నారు. మరొక వైపు, రానా ఆగస్టు 8 న వివాహం చేసుకోబోతున్నాడు. అప్పటి వరకు షూటింగులను తిరిగి ప్రారంభించే ఆలోచన ఆయనకు లేదని సమాచారం. విరాటపర్వం సినిమాకు కేవలం ఐదు రోజుల పనే బ్యాలన్స్ ఉంది.