రాయపాటి అరుణ.. ఓ వీర మహిళ పోరాటం, ఆవేదన

Rayapati Aruna's Allegations After Janasena Election Defeat

‘మున్సిపోల్స్’లో కూటమి ఘన విజయం సాదించడంతో మూడు పార్టీల శ్రేణులు పండగ చేసుకుంటున్నారు. మరోపక్క వైసీపీ కార్యాలయాలు వెలవెలబోతున్నాయి. ఈ రెండింటితో పాటు ఈ ఎన్నికలలో ఓడిపోయిన లేదా నాయకుల చేతిలో మోసపోయిన వారి కథలు కూడా వినిపిస్తున్నాయి.

ఒంగోలు జిల్లాకు చెందిన జనసేన అధికార పార్టీ ప్రతినిధి, వీర మహిళ రాయపాటి అరుణ కూడా అటువంటి వారిలో ఒకరు. ఆమె ‘ఎక్స్‌’లో ఓ పెద్ద పోస్ట్ పెట్టారు.

దానిలో… ఈ ఎన్నికలలో తనకు ఎదురైన చేదు అనుభవాల గురించి ఆమె చెప్పింది జనసైనికుల మనోభావాలను ప్రతిభింబిస్తున్నట్లే అనిపిస్తుంది. ముఖ్యంగా జనసేన అధిష్టానం ఇలాంటి విషయాలపై దృష్టి పెట్టాల్సిన అవసరం ఉందని ఈ లేఖ స్పష్టం చేస్తోంది.

ఆమె ఏమన్నారో క్లుప్తంగా, “ఈ ఎన్నికలు… ఈ ఓటమి నాకు చాలా విలువైన రాజకీయ పాఠాలు నేర్పాయి. నా శ్రమ, నిబద్దత, డబ్బు, అన్నీ వృధా అయ్యాయి. అయితే నా ప్రయత్నలోపం వలన కాక, పార్టీలోనే కొందరు వ్యక్తులు, మిత్రపక్షానికి చెందిన కొందరు ఆడిన ‘డబుల్ గేమ్స్’ వలన ఓడిపోయినందుకు నేను చాలా బాధపడుతున్నాను.

స్థానికంగా ఉన్న నన్ను కాదని కూటమి రాజకీయ శత్రువు వైసీపీ నుంచి వచ్చిన వ్యక్తికి కండువా కప్పి అభ్యర్ధిగా ఖరారు చేశారు. అయినప్పటికీ పెద్దల సూచన మేరకు నేను నాకు పరిచయం లేని ‘త్రోవగుంట’లో నామినేషన్స్‌ వేశాను. కానీ అక్కడా ‘నాకు ఓట్లు వేయవద్దని.. మన కులపు అమ్మాయికే ఓట్లు వేయమని’ అంతర్గతంగా ప్రచారం చేశారు. తత్ఫలితంగా 100కి పైగా ఓటర్లు ఒక బూత్ పరిధిలో మేయర్‌ అభ్యర్ధికి ఓటు వేసి, నాకు ఓటు వేయకుండా బ్యాలెట్ పేపర్ మడత పెట్టి డబ్బాలో వేశారు. కౌంటింగ్ సమయంలో అది చూసి చాలా బాధ పడ్డాను.

ఓ పక్క వైసీపీతో, మరోపక్క సొంత మనుషులతో పెద్ద యుద్ధమే చేశాను. కానీ ఓడిపోయాను.

కానీ నేను వీర మహిళను. ఈ ఓటమి వలన కలిగే బాధ కంటే ఈ ఎన్నికల ద్వారా నేర్చుకున్న అనేక కొత్త విషయాలు మున్ముందు నాకు బాగా ఉపయోగపడతాయని గట్టిగా నమ్ముతున్నాను.

నేను ఓడిపోయినా ‘త్రోవగుంట’లో ప్రజలకు ఇచ్చిన మాట ప్రకారం వారికి ఎల్లప్పుడూ అందుబాటులో ఉంటాను. వారి సమస్యల పరిష్కారానికి నా శక్తిమేర కృషి చేస్తానని రాయపాటి అరుణ పేర్కొన్నారు.

అందరికి నమస్కారం.
మేము గెలిచాము అని కొన్ని పోస్ట్ లు.
ఓడిపోయాము అని కొన్ని పోస్ట్ లు చూసాను.
మేము పోటీ చేసిన డివిజన్ నుండి ఓడిపోయాం. అక్కడ వైసీపీ గెలిచింది.
ఈ ఓటమి నుండి నేను బాధ పడకపోగా చాలా నేర్చుకున్న.
నేను నిరంతరం రాజకీయాల్లోనే ఉన్నాను, ఉంటాను. నాకు అవకాశం ఈరోజు కాకపోతే రేపు వస్తుంది. కానీ నా ప్రయాణం లో కుటుంబ భారం మొత్తం మోస్తున్న మావారికి మా డివిజన్ రిజర్వేషన్ మారటం తో ఒక అవకాశం వచ్చింది. తన నాయకత్వం లో మా ఊరు కి సర్వీస్ చేసి తన మంచితనం, నాయకత్వం ద్వారా లోకల్ గా పనులు చెయ్యాలి అనే అభిప్రాయం తో ఎన్నికలు బరిలో దిగాను. కలెక్టర్ గారి నుండి రిజర్వేషన్ సర్కులర్ రాగానే ముందుగా స్థానికం గా ఉన్నా టీడీపీ లీడర్లకే సమాచారం ఇచ్చాము. మన డివిజన్ నుండి మావారు పోటీ చేస్తారు. దానికి కావాల్సిన అవసరాలు నేను ఏర్పాటు చేసుకుంటా అని. ముందు సరే కూర్చొని మాట్లాడుకుందాం అన్నారు. నేను నమ్మి మిగిలిన నామినేషన్ తాలూకు పనులు పూర్తి చేసుకుంటూ ఉన్నా. ఇంతలో నాకు ఎలాంటి సమాచారం ఇవ్వకుండా లోకల్ గా ఒక మాజీ వైసీపీ వ్యక్తి ని టీడీపీ తరుపున కంటెస్టెంట్ గా ఊరు శివాలయం దగ్గర మీటింగ్ పెట్టి ప్రకటించారు. మరుసటి రోజూ ఉదయం అతనికి టీడీపీ కండువా వేశారు MLA గారి సమక్షంలో.
ఆ విషయం తెలిసి వెళ్లి MLA గారి తో ఆర్గుమెంట్ పెట్టుకున్న. రెండు రోజులు ఇద్దరి మధ్యలో జరిగిన మాటలు ప్రభావం చివరిగా మా అమ్మ గారి ఊరు అయిన త్రోవగుంట కి వెళ్ళమని పట్టు బట్టాడు ఆయన. నేను వెళ్లను అక్కడ వైసీపీ మెజారిటీ వచ్చే డివిజన్ అది. పైగా లోకల్, నాన్ లోకల్ అనే వాదన తో ఇబ్బంది పెడతారు. నేను వెళ్లను మా డివిజన్ లోనే jsp or ఇండిపెండెంట్ గా వేసి ఎలక్షన్ చేసుకుంటా అని చెప్తే… MLA గారు కుదరదు అలా వెయ్యొద్దు, అక్కడ నాయకులని పిలిచి మాట్లాడతా అన్నాడు. పిలిచి మాట్లాడి వాళ్ళని ఒప్పించి మమ్మల్ని పంపించాడు అక్కడ కి. కానీ వాళ్ళ ని సమన్వయము చేయటం లో ఆయన ఫెయిల్ అయ్యారు. ఆ తరువాత ఎదురు అయినా చాలా పరిణామాలు MLA గారి దృష్టిలో పెట్టిన సరే సరైన స్పందన లేదు. ఒక పక్క ప్రచారం మరొక పక్కన మిగిలిన అవసరాలు కోసం ప్రయాస, తో పాటు ఈ వ్యతిరేక దృవాలు సమన్వయము నాకు కత్తి మీద సాము అయ్యింది. ఇది ఇలా ఉంటే.
అటు వైసీపీ నుండి నాన్ లోకల్ ఫీలింగ్, మాల, మాదిగ అనే అంతరం తీవ్రంగా తెచ్చారు. నాకు సపోర్ట్ ఉంటారు అనుకున్న పెద్ద నాయకులు అవసరానికి ఏ విధంగాను అందిరాలేదు..మా అధ్యక్షులు వారు శాలువా కప్పిన నాయకుడు కూడా అక్కడ jsp కి వెయ్యొద్దు మన సామాజిక వర్గం అమ్మాయికి వెయ్యండి అని అంతర్గత ప్రచారం చేయటం కొసమెరుపు.
టికెట్ తెచ్చుకోవటం నుండి నిన్న రిజల్ట్స్ వరకు ఒంటరి పోరాటమే చేశాను. ఈ ఓటమి నన్ను బాధపెట్టకపోగా కొండంత మనో దైర్యం ఇచ్చింది. ఇంతకంటే పెద్ద ఎలక్షన్ చేయగలిగే అనుభవం ఇచ్చింది. ఆర్ధికంగా నష్టపోయాను అనే చిన్న కినుక తప్ప మిగిలిన అన్నీ నాకు పనికొచ్చేవే జరిగాయి ఈ ఎలక్షన్ వలన.
మేము పోటీ చేసిన ఊర్లో చాలా సమస్య లు ఉన్నాయి. వాటిని పూర్తి చేస్తా అని చాలా బలం గా చెప్పా. కానీ ప్రజలు ఇచ్చిన తీర్పు అంతిమం. ఇప్పుడు గెలిచిన వారి ఆధ్వర్యంలో అయినా ఆ ఊరు బాగుపడాలి అని బలం గా కోరుకుంటున్నాను.వర్షాకాలం ఎవరైనా చనిపోతే పుట్టిన ఊరు లో కాకుండా పోరుగూరు తీసుకొని వెళ్లి ఖననం చెయ్యాల్సిన దుస్థితి అక్కడ. మంది ఎక్కువ అయితే మజ్జిగ పలుచన అనే దానికి ఆ ఊరు నిదర్శనం. నాయకులు ఎక్కువ ఉండటం వలన ఊరు వర్గాల పోరు లో ఆగం అయ్యింది అక్కడ.
12రోజులు వ్యవధి లో నన్ను ఇంతగా నమ్మి ఓట్లు వేసిన 1509మంది ఓటర్లకి నేను చేయగలిగిన సాయం చేస్తూ అందుబాటులో ఉంటా అని మాటిస్తున్న.
మేయర్ కి ఓటు వేసి కార్పొరేటర్ కి కాళీ స్లిప్ మడతపెట్టి వేసి వెళ్లారు 100కి పైగా ఓటర్లు ఒక బూత్ పరిధి లో. అది కొసమెరుపు అక్కడ 🤣🤣. నవ్వాలో, జాలిపడాలో అర్ధం కానీ పరిస్థితి నిన్న ఆ కౌంటింగ్ అప్పుడు నాకు ఆ బ్యాలెట్ స్లిప్స్ చూసి 🤦‍♀️. రేపు ఎలక్షన్ కి కొన్ని జాగ్రత్త లు మీకు పనికొస్తాయ్. తరువాత ట్వీట్ లో చెప్తా

— aruna janasena (@RayapatiAruna) November 4, 2026