‘స్పై’ కెమెరాల కాంపెయిన్ లో సమంత, మెహ్రీన్!

‘స్పై కెమెరాలు’ మహిళల జీవితంలో ఎంతటి ప్రభావితాన్ని చూపుతున్నాయో ప్రత్యేకంగా చెప్పనవసరం లేదు. ముఖ్యంగా సెలబ్రిటీలకైతే కంటి మీద కునుకు లేకుండా చేస్తుంటాయి. అప్పట్లో హీరోయిన్ త్రిష ఉదంతం కలకలం రేపగా, ఆ తర్వాత హీరోయిన్లు వ్యక్తిగతంగా పలు జాగ్రత్తలు తీసుకుంటున్నారు. అయితే ఈ స్పై కెమెరాల నియంత్రణపై హెవెన్ హోమ్స్ సొసైటీ అనే స్వచ్ఛంద సంస్థ ఆధ్వర్యంలో ఓ కార్యక్రమం కూడా జరిగింది.

స్పై కెమెరాలు మహిళల జీవితాలతో చెలగాటమాడుతున్నాయని… ఈ కెమెరాల నియంత్రణకు ప్రభుత్వం ప్రత్యేక చట్టం తీసుకురావాలని, ఈ రహస్య కెమెరాలు ఆన్ లైన్ లో కేవలం 250కే లభిస్తున్నాయని… దీంతో, ఎంతో మంది వీటిని సొంతం చేసుకుంటున్నారని నటి సనా ఆవేదన వ్యక్తం చేశారు. ఈ సందర్భంగా ‘యాంటీ రెడ్ ఐ’ పేరుతో చేపడుతున్న మిస్ట్ కాల్ (8099259925) క్యాంపెయిన్ బ్రోచర్ ను సనా ఆవిష్కరించారు.

రహస్య కెమెరాల వల్ల కలుగుతున్న అనర్థాల పట్ల నటీమణులు సమంత, మెహ్రీన్ లు కూడా ఎంతో ఆవేదన చెందారని, వీరిద్దరూ కూడా ఈ ‘మిస్డ్ కాల్’ క్యాంపెయిన్ లో భాగస్వాములయ్యారని చెప్పారు. టూత్ బ్రష్, షాంపు బాటిల్స్ లో కూడా చాలా సులువుగా స్పై కెమెరాలు పెట్టేస్తున్నారని అన్నారు. ఈ కెమెరాలను దుర్వినియోగం చేస్తూ మహిళల జీవితాలను నాశనం చేస్తున్నారని, తుపాకులకు లైసెన్సులు ఇస్తున్నట్టుగానే… ఈ కెమెరాలకు కూడా లైసెన్స్ లు తప్పనిసరి చేయాలని అన్నారు.