కమల్ – గౌతమిల బ్రేకప్ స్టోరీలో శృతి రోల్?

ప్రముఖ నటుడు కమల్ హాసన్ తో విడిపోతున్నానంటూ నటి గౌతమి చేసిన ప్రకటన అందర్నీ ఆశ్చర్యానికి గురి చేసింది. వివాహం చేసుకోనప్పటికీ, గత 13 సంవత్సరాలుగా వీరిద్దరూ ఎంతో అన్యోన్యంగా కలసి బతికారు. గౌతమి బ్రెస్ట్ కేన్సర్ తో బాధపడుతున్నప్పుడు కమల్ అండగానే ఉండి, ఎన్నో సేవలు చేసారు. ఎంతో అనుబంధం గల కమల్ నుంచి విడిపోతున్నానంటూ గౌతమి ప్రకటించడం హాట్ టాపిక్ గా మారింది. దీనికంతటికీ కారణం కమల్ కుమార్తె, హీరోయిన్ శ్రుతిహాసన్ తో ఏర్పడ్డ విభేదాలే అని తెలుస్తోంది.

‘శభాష్ నాయుడు’ సినిమా షూటింగ్ లాస్ ఏంజెలెస్ లో జరుగుతున్న సమయంలో వీరిద్దరికీ విభేదాలు తలెత్తాయని తెలుస్తోంది. ఆ సినిమాకు కాస్ట్యూమ్ డిజైనర్ గా పనిచేసిన గౌతమి ఎంపిక చేసిన దుస్తులు శ్రుతిహాసన్ కు నచ్చలేదట. ఇదే విషయాన్ని గౌతమి ముఖం మీదే చెప్పేసిందట. దీంతో, ఇద్దరి మధ్య గొడవ ఏర్పడింది. ఈ వ్యవహారంలో కమల్ తన కుమార్తె శ్రుతిహాసన్ వైపే నిలబడ్డారని… ఇది గౌతమికి తీవ్ర ఆవేదన కలిగించిందని సమాచారం.

ఈ కారణంగానే కమల్ తో విడిపోవాలనే నిర్ణయానికి గౌతమి వచ్చి ఉంటుందని కోలీవుడ్ టాక్. గత రెండు నెలలుగా కమల్ కు దూరంగానే ఉంటున్న గౌతమి, తాజాగా ఆ విషయాన్ని అధికారికంగా ప్రకటించింది. ఏది ఏమైనా, కమల్ కు ఇది మూడో బ్రేకప్! మరో పక్కన, తన తండ్రి కమలహాసన్ తో గౌతమి విడిపోవడంపై హీరోయిన్ శ్రుతిహాసన్ స్పందించింది. ఇది వారిద్దరికీ సంబంధించిన వ్యక్తిగత విషయమని… ఇతరుల వ్యక్తిగత జీవితం, నిర్ణయాలపై తాను మాట్లాడనని, తనకు తన తల్లిదండ్రులు, చెల్లెలు అక్షర హాసన్ లే ముఖ్యమని స్పష్టం చేసింది.