ఏపీకి సముద్రమే పెద్ద వరం… చేపలు, పోర్టులు, పెట్టుబడులు!

ఆంధ్రప్రదేశ్‌ రాష్ట్రానికి 1,050 కిమీ పొడవైన సముద్రతీరం ఉంది. ఈ కారణంగా ఇప్పటికే ఆక్వా రంగంలో ఏపీ అగ్రస్థానంలో ఉంది. సముద్రంలో చేపలు మాత్రమే కాదు సముద్ర తీరాలు (బీచ్) పర్యాటక ఆకర్షణ కేంద్రాలుగా నిలుస్తున్నాయి. ఈ సముద్రం తీరం వెంబడి అనేక పోర్టులు ఉన్నాయి. కొత్తవి అనేకం నిర్మించ బడుతున్నాయి. కనుక సువిశాలమైన సముద్రతీరమే ఏపీకి అతి పెద్ద వరంగా మారబోతోంది.

ఏపీ మోల్లర్-మార్స్క్ (ఏపీఎం) కంపెనీ రూ.9,000 కోట్లు పెట్టుబడి పెట్టబోతోంది. ఈ మేరకు సిఎం చంద్రబాబు నాయుడు సమక్షంలో ఏపీఎం-ఏపీ మారిటైం బోర్డు ఒప్పంద పత్రాలపై సంతకాలు చేశాయి.

ఏపీఎం కంపెనీ రూ.9,000 కోట్లు పెట్టుబడితో రామాయపట్నం, మచిలీపట్నం, మూలపేట పోర్టులను అభివృద్ధి చేసి అక్కడ అత్యాధునిక సదుపాయాలతో అంతర్జాతీయ స్థాయి టెర్మినల్స్, కార్గో హ్యాండ్లింగ్ వ్యవస్థలు ఏర్పాటు చేస్తుంది. అలాగే ఈ మూడు పోర్టుల నిర్వహణ బాధ్యత కూడా తీసుకుంటుంది.

ప్రస్తుతం తెలంగాణ, ఛత్తీస్ ఘడ్, మధ్యప్రదేశ్, ఓడిశా రాష్ట్రాలు ఏపీలో పోర్టులను ఉపయోగించుకుంటున్నాయి. కనుక ఏపీఎం కేవలం పోర్టులకే పరిమితం కాకుండా ఈ మూడు పోర్టుల నుంచి రాష్ట్రంలో అన్ని ప్రాంతాలకు, ఇరుగు పొరుగు రాష్ట్రాలకు సరుకు రవాణాకు వీలుగా రైలు, రోడ్ మార్గాల అభివృద్ధికి కూడా ప్రణాళికలు సిద్దం చేయాలని సిఎం చంద్రబాబు నాయుడు సూచించారు.

ముఖ్యంగా ఈ మూడు పోర్టుల చుట్టూ ఉండే జిల్లాలు, ప్రాంతాలలో ఆర్ధికాభివృద్ధికి, భారీగా ఉద్యోగాల కల్పనకు దోహదపడేవిధంగా ప్రణాళికలు రచించుకోవాలని సూచించారు.

భవిష్యత్తులో ప్రతీ 50-100 కిమీలకు ఒక పోర్టు నిర్మించడం ద్వారా ఆంధ్రప్రదేశ్‌ రాష్ట్రానికి దక్షిణాది రాష్ట్రాలలో ప్రధాన రవాణా కేంద్రంగా మార్చాలనుకుంటున్నట్లు సిఎం చంద్రబాబు నాయుడు చెప్పారు.

ఈ రంగంలో ఏపీఎం కంపెనీకి విశేష అనుభవం ఉంది కనుక దీని రాకతో ఏపీలో పోర్టులు మరింత వేగంగా అభివృద్ధి చెందుతాయి. మరిన్ని కొత్త పోర్టులు వచ్చే అవకాశం ఉంటుంది.