ఒకప్పుడు 40… ఇప్పుడు 35 అనుకుంటున్నా..!

టాలీవుడ్ మోస్ట్ ఎలిజిబుల్ బ్యాచిలర్ జాబితాలోకి విజయ్ దేవరకొండ చేరిపోయారు. ఇప్పటికే ఈ జాబితాలో గత కొన్ని సంవత్సరాలుగా యంగ్ రెబల్ స్టార్ ప్రభాస్, రానాలు ఉండగా, ఇప్పుడు వీరి సరసన విజయ్ కూడా చేరారు. వాళ్ళిద్దరితో పోలిస్తే తక్కువ వయసే ఉన్నప్పటికీ, విజయ్ ఆలోచనలు మాత్రం వారిద్దరి వయసు వచ్చేటంతవరకు పెళ్లి చేసుకోకూడదన్న భావనను వ్యక్తపరిచారు.

[m9ad]

ప్రస్తుతం 29వ సంవత్సరంలో ఉన్న విజయ్, ఒకప్పుడు తనకు 40 ఏళ్ళు వచ్చేవరకు పెళ్లి చేసుకోకూడదని భావించానని, అయితే “గీత గోవిందం” సినిమా ప్రభావమో ఏమో గానీ, ప్రస్తుతం 35 వరకు దించానని, భవిష్యత్తులో ఏం జరుగుతుందో చూద్దామంటూ తాజాగా ఇచ్చిన ఓ ఇంటర్వ్యూలో చెప్పుకొచ్చాడు విజయ్. అయితే తన మైండ్ సెట్ కు పెద్దలు కుదిర్చిన వివాహం సరిపోదంటూ కుండబద్దలు కొడుతూ చెప్పారు.

ఎప్పటికైనా ప్రేమ వివాహమే చేసుకుంటానని చెప్పిన విజయ్, ఆమె తెలంగాణాకు చెందిన అమ్మాయి కావచ్చు, కాకపోవచ్చు, ప్రపంచంలో ఎవరైనా అయ్యుండొచ్చు, కనెక్ట్ కావాలి కదా… ఒకరికొకరు తెలుసుకోవాలి కదా… అంటూ తన భావాలను పంచుకున్నారు. అలాగే ‘గీత గోవిందం’లో గోవింద్ క్యారెక్టర్ మాదిరి తనకు ప్రత్యేకంగా ఎలాంటి కోరికలు లేవని, కొంచెం కొంచెం ఉండడం ఎవరికైనా సహజమే అంటూ తన పెళ్లి సంగతులను చెప్పుకొచ్చారు.