‘రిలీజ్’ కాని సినిమాకు ‘రివ్యూ’లు వచ్చేసాయ్!

ఇంకా పబ్లిక్ ధియేటర్ బొమ్మ పడకముందే… “జయమ్ము నిశ్చయమ్మురా” సినిమాకు సోషల్ మీడియాలో రివ్యూలు వచ్చేసాయి. ‘చక్కని తెలుగు నేటివిటి ఉన్న సినిమా’ అని, ‘ఫీల్ గుడ్ ఎంటర్టైనర్’ అని, ‘దేశవాళీ వినోదం లాంటి సినిమా’ అని… ఒకటేమిటిలేండి… సర్వత్రా పాజిటివ్ టాక్ తో సోషల్ మీడియా అంతా గుప్పుమంది. నిజానికి ఇలాంటి ప్రచారమే ఈ ఏడాది మరో చిన్న సినిమాకు కూడా జరిగింది.

ఒక వారం ముందే నెట్టింట్లో “పెళ్లిచూపులు” సినిమాకు సంబంధించిన రివ్యూలు ప్రత్యక్షమయ్యాయి. దీంతో సాధారణ ప్రేక్షకులు అవాక్కయ్యారు. అయితే సినిమా పబ్లిసిటీలో భాగంగా, తమ సినిమాపై ఉన్న నమ్మకంతో జర్నలిస్టులకు, ప్రముఖ సినీ సంబంధీకులకు “పెళ్లిచూపులు” సినిమా స్పెషల్ షోలు వేసి మరీ చూపించారు. దీంతో ఈ సినిమా ఫుల్ పాజిటివ్ మోడ్ లో విడుదలై, ప్రేక్షకుల మనసు గెలుచుకుంది.

తాజాగా ఇదే బాటలో “జయమ్ము నిశ్చయమ్మురా” సినిమా కూడా పయనిస్తోంది. మరికొద్ది గంటల్లో విడుదల ఉందనగా, ఈ సినిమా ప్రివ్యూలను సినీ ప్రముఖులకు, విలేఖరులకు ప్రదర్శించడంతో… ఈ సినిమా టాక్ కాస్త విడుదలకు ముందే బయటకు వచ్చేసింది. ‘పెళ్లిచూపులు’ మాదిరే ‘జయమ్ము నిశ్చయమ్మురా’కు కూడా ఫుల్ పాజిటివ్ రివ్యూలు సోషల్ మీడియాలో హల్చల్ చేస్తున్నాయి. దీంతో హీరోగా ఎంట్రీ ఇవ్వబోతున్న కమెడియన్ శ్రీనివాస్ రెడ్డి సక్సెస్ అయినట్లే అన్న టాక్ సర్వత్రా వినపడుతోంది.