జేసీ తడాఖా… ‘అధికారం’ అనే ‘ఈగో’ అలా ఉంటుంది మరి!

చిత్తూరు జిల్లాలో వైసీపీ ఎంపీ మిథున్ రెడ్డి మరియు ఇతర పార్టీ సభ్యులు ‘చెవిరెడ్డి అండ్ కో’ సృష్టించిన వీరంగం రాజకీయ విజ్ఞులకు తెలిసిందే. దీనిపై ప్రస్తుతం కోర్టులో కేసు కూడా నడుస్తోంది. ప్రతిపక్షంలో ఉన్న ఎంపీనే అంత చేస్తే… అధికార పక్షంలో ఉన్న ఎంపీకి ఇంకెంత అవకాశం ఉంటుంది? శుక్రవారం నాడు టిడిపి ఎంపీ జేసీ దివాకర్ రెడ్డి చేసింది కూడా అదే! ‘అధికారం’ అనే ‘ఈగో’తో విమనాశ్రయపు నిబంధనలను పక్కన పెట్టాలని, ఎంపీని అయిన నాకే ఎదురుచెప్తారా? అని ఓ రేంజ్ లో వీరంగం సృష్టించారు.

జేసీ గారి ఆగ్రహం ఎక్కడివరకు చేరుకుంది అంటే… విమానాశ్రయంలోని కంప్యూటర్లను ధ్వంసం చేయడానికి ప్రయత్నించేటంతగా..! విమానాశ్రయానికి ఆలస్యంగా చేరుకున్న దివాకర్ రెడ్డిని బోర్డింగ్ ముగిసిపోయిందని అధికారులు లోపలికి అనుమతించకపోవడంతో ఆగ్రహం చెందిన జేసీ సృష్టించిన హంగామా ఇదంతా! మీ ప్రయాణం లేదని ప్రోటోకాల్ వారు చెప్పడంతో బోర్డింగ్ ముగించినట్లు అధికారులు చెప్తున్నా… వినిపించుకోని జేసీ, తనకే బోర్డింగ్ ముగిసిందని చెప్తారా… అంటూ మండిపడ్డారు.

వేరే విమానంలో మిమ్మల్ని పంపించే బాధ్యత తమదని అధికారులు చెప్తున్నా వినిపించుకోని జేసీ విషయం తెలుసుకున్న విజయవాడ ఎంపీ కేశినేని నాని విమానాశ్రయానికి చేరుకొని, జేసీకి సర్దిచెప్పి విశ్రాంతి భవనంలోకి తీసుకువెళ్ళారు. జేసీ గారు చేసిన ఈ సందడి మొత్తం వీడియోలో రికార్డ్ కావడంతో, మీడియా వర్గాల్లో ప్రముఖంగా సదరు వీడియో ప్రసారమవుతోంది.