మాంత్రికుడు మంత్ర దండం తిప్పి గాల్లోంచి పావురాలు సృష్టించిన్నట్లు, జగన్‌ కోసం విజయసాయి రెడ్డి కూడా అనేక సూట్ కేసు కంపెనీలు సృష్టించి ఇచ్చారు. ఆ ఆక్రమస్థుల కేసులలో ఏ-2గా జగన్‌ వెంట చంచల్ గూడా జైలుకి కూడా వెళ్ళి వచ్చిన విజయసాయి రెడ్డి, మళ్ళీ ఏ-1 కోసం మరో కొత్త సమస్యలో చిక్కుకోవడమే విచిత్రం.
కాకినాడ సీపోర్ట్ వాటాల వ్యవహారంలో విజయసాయి రెడ్డి, విక్రాంత్ రెడ్డి, అరబిందో అధినేత శరత్ చంద్రారెడ్డి ముగ్గురిపై ఏపీ సీఐడీ ‘లుక్ అవుట్’ నోటీస్ జారీ చేసింది.
ఆ కేసులో కాకినాడ సీపోర్ట్ ప్రధాన భాగస్వామి కర్నాటి వేంకటేశ్వర రావుని బెదిరించి రూ.3,600 కోట్ల విలువైన వాటాలను బలవంతంగా అరబిందో కంపెనీ పేర బదలాయించుకున్నారని ఏపీ సీఐడీ కేసు నమోదు చేసి, ఈ ముగ్గురిపై లుక్ అవుట్ నోటీస్ జారీ చేసింది. నిందితులుగా ఉన్న ముగ్గురూ విదేశాలకు పారిపోకుండా ముందస్తు జాగ్రత్త చర్యగా ‘లుక్ అవుట్ నోటీస్’ జారీ చేసిన్నట్లు అధికారులు తెలిపారు.
ఢిల్లీ మద్యం కుంభకోణం విలువ వంద కోట్లు. ఆ కేసులో ఢిల్లీ ముఖ్యమంత్రిగా ఉన్న అరవింద్ కేజ్రీవాల్, కేసీఆర్‌ కుమార్తె కల్వకుంట్ల కవితలతో సహా పలువురు అరెస్ట్ అయ్యారు. ఈ పోర్టు వాటాలు విలువ ఏకంగా రూ.3,600 కోట్లు. ఆ లెక్కన ఇది మరింత తీవ్రమైన ఆర్ధిక నేరమే అవుతుంది.
ఒకవేళ కూటమి ప్రభుత్వం ఎటువంటి ఒత్తిళ్లకు లొంగకుండా ఈ కేసుని నిర్భయంగా విచారణ జరిపించగలిగితే, పౌరసరఫరా శాఖ, పోర్టు, పోలీస్ తదితర శాఖలలో పాత్రధారులతో పాటు దీని సూత్రధారులు కూడా దొరుకుతారు.
కానీ ఈ కేసులు, అరెస్టులకు నెగెటివ్ కోణం మాత్రమే కాదు.. సానుభూతి అనే పాజిటివ్ కోణం కూడా ఉంటుంది. కనుక కూటమి ప్రభుత్వం ఆచితూచి అడుగులు వేయక తప్పదు. ఆ బలహీనతే వైసీపీకి శ్రీరామ రక్షగా నిలుస్తుంది.
కనుక తిరుమల కల్తీ నెయ్యి వ్యవహారంలా ఈ కేసు కూడా రాజకీయ వేడికి కరిగిపోతుందో లేదా చలికి గడ్డ కట్టుకుపోతుందో తెలీదు. కానీ ప్రస్తుతానికి ఇదే హాట్ టాపిక్.
Vijay Deverakonda and Rashmika Mandanna visited Tirumala ahead of Ranabaali's release and offered prayers for…
The opposition’s march to the Supreme Court over voter-list revision has put the BJP in…
