సుకుమార్ దర్శకత్వం వహించిన ‘నాన్నకు ప్రేమతో’ సినిమాలో జగపతిబాబు చెప్పినట్లుగా ‘ఇది గుర్తు పెట్టుకో… మళ్ళీ మాట్లాడదాం…’ అన్న డైలాగ్ మాదిరి ‘భ్రమరాంబకు నచ్చేసాను… జజ్జనక అంబరమే టచ్ చేసాను…’ అన్నవి గుర్తు పెట్టుకోండి. ఎందుకంటే రాబోయే రెండు, మూడు నెలల్లో ఈ పదాలను ఎక్కువగా పలుకుతూ ఉంటామని చెప్పాలి. అవును… ‘100% లవ్’ సినిమాతో ‘డియ్యాలో డియ్యాలో’ అంటూ ఊపేసిన దేవిశ్రీప్రసాద్, ఈ సారి ‘భ్రమరాంబకు నచ్చేసాను…’ అంటూ ఊపేయబోతున్నాడు.
దేవిశ్రీప్రసాద్ హుషారైన సంగీతం అందిస్తే ఏ రేంజ్ లో ఉంటుందో మరోసారి చాటిచెప్పిన పాటగా ఈ “భ్రమరాంబకు నచ్చేసాను…” నిలుస్తుందని చెప్పడంలో సందేహం లేదు. ఇటీవల కాలంలో ఆడియో హిట్స్ లేక సంగీత ప్రియులు అల్లాడిపోతున్న తరుణంలో దేవిశ్రీ వదిలిన ఈ పాట అదరగోట్టేయబోతుందన్న నమ్మకాన్ని కలిగించింది. శ్రీమణి అందించిన సాహిత్యానికి దేవిశ్రీ సోదరుడు సాగర్ జోష్ ఫుల్ స్వరం తోడై సంగీత, సాహిత్య ప్రియులను స్టెప్ లు వేయిస్తోంది ఈ పాట. ఇంతకీ ఇది ఏ సినిమా నుండో చెప్పలేదు కదూ… చైతూ, రకుల్ ప్రీత్ లు జంటగా నటిస్తున్న “రారండోయ్ వేడుక చూద్దాం” సినిమా ఆల్బమ్ లోనిది ఈ సూపర్ హిట్ సాంగ్..!
