కమర్షియల్ పంథాలో వైవిధ్యభరితమైన పాత్రలను ఎంచుకుంటూ ముందుకు సాగుతోన్న ‘నాచురల్ స్టార్’ నాని, తన నటనకు పదును పెట్టే పాత్రలను ఎంపిక చేసుకుంటున్నాడు. ప్రస్తుతం ఆదిత్య శ్రీరామ్ దర్శకత్వంలో నాగ్ తో కలిసి ‘దేవదాస్’ అనే మల్టీస్టార్ సినిమా చేస్తుండగా, ఈ షూటింగ్ ముగింపు దశకు చేరుకుంది. ఇక నాని హోస్ట్ గా చేస్తోన్న ‘బిగ్ బాస్ 2’ కూడా ముగింపు దశకి చేరుకుంటోంది. ఈ రెండు ప్రాజెక్టులు పూర్తికాగానే నాని, తన తదుపరి చిత్రంగా “జెర్సీ”ని మొదలుపెట్టనున్నాడు.
[m9ad]
క్రికెట్ నేపథ్యంలో సాగే ఈ సినిమాలో నాని మూడు డిఫరెంట్ లుక్స్ తో కనిపించనున్నాడని తెలుస్తోంది. అందులో ఒకటి యువకుడిగా… మరొకటి మధ్య వయస్కుడిగా… ఇంకొకటి వృద్ధుడిగా మూడు దశలలో తెరపై కనిపించనున్నాడని సమాచారం. నటనకి మంచి స్కోప్ ఉండటంతో నాని ఈ సినిమాపై ఎంతో ఆసక్తితో, మరెంతో ఉత్సాహంతో వున్నాడని చెబుతున్నారు. సెప్టెంబర్ 2వ వారం నుంచి ఈ సినిమా రెగ్యులర్ షూటింగును ఆరంభించడానికి సన్నాహాలు జరుగుతున్నాయి.
సితార ఎంటర్టైన్మెంట్ వారు నిర్మించే ఈ సినిమాకి, గౌతమ్ తిన్ననూరి దర్శకుడిగా వ్యవహరించనున్నాడు. మూడు పాత్రలలో కాకపోయినా, ఒకే సినిమాలో మూడు డిఫరెంట్ గెటప్స్ తో కనిపించి అభిమానులను అలరించేందుకు సిద్ధమవుతున్నాడు నాని. ఈ తరం హీరోలలో జూనియర్ ఎన్టీఆర్ ఒక్కడే ‘జై లవకుశ’ సినిమాలో మూడు విభిన్న పాత్రలను పోషించి ఫ్యాన్స్ ను అలరించాడు. బహుశా తారక్ తర్వాత నాచురల్ స్టార్ కే ఈ అవకాశం దక్కిందేమో!
