“సర్ధార్ గబ్బర్ సింగ్, కాటమరాయుడు” సినిమాల పరాజయాల తర్వాత నిరుత్సాహంలో ఉన్న పవర్ స్టార్ అభిమానులు, ప్రస్తుతం త్రివిక్రమ్ శ్రీనివాస్ దర్శకత్వంలో నటిస్తోన్న సినిమా కోసం ఎదురుచూస్తున్నారు. శరవేగంగా షూటింగ్ జరుపుకుంటున్న ఈ సినిమా త్రివిక్రమ్ కెరీర్ లోనే అత్యంత త్వరగా షూటింగ్ ముగించుకునే సినిమాగా నిలవనుంది. ఈ ఏడాది సెకండాఫ్ లో ప్రేక్షకుల ముందుకు రాబోతున్న ఈ సినిమా గురించి గత రెండు రోజులుగా సోషల్ మీడియాలో పుకార్లు షికారు చేస్తున్నాయి.
ఈ సినిమా ధియేటర్ల హక్కుల కోసం నైజాం ఏరియాలో 32 కోట్లకు, అలాగే ఆంధ్ర ప్రాంతంలో 45 కోట్లకు, సీడెడ్ లో 16 కోట్ల వరకు డిమాండ్ ఉందని… ఇలా రకరకాలుగా ఫ్యాన్సీ రేట్లు హల్చల్ చేస్తున్నాయి. ఈ మొత్తం చెప్తున్న లెక్కల ప్రకారం… పవర్ స్టార్ – త్రివిక్రమ్ ల సినిమా ‘బాహుబలి’ తర్వాత స్థానంలో నిలబెడుతోంది. అయితే నిజంగా ఇంత డిమాండ్ ఉందా? లేదా? అన్న విషయం పక్కనపెడితే, ఇప్పటివరకు ఈ సినిమా బిజినెస్ ను నిర్మాత ఓపెన్ చేయలేదని విశ్వసనీయ సమాచారం.
పవన్ – త్రివిక్రమ్ కాంభినేషన్ కాబట్టి సహజంగానే మార్కెట్ వర్గాల్లో క్రేజ్ ఉంటుంది. ఆ క్రేజ్ ను దృష్టిలో పెట్టుకుని ఈ ఫిగర్స్ ని సృష్టిస్తున్నారు గానీ, ఇందులో వాస్తవం లేదని లభించిన కీలక సమాచారం. ఈ లెక్కల ప్రకారం ప్రీ రిలీజ్ బిజినెస్ దాదాపుగా 90 కోట్ల పైమాటే కాగా, ఆ స్థాయిలో నిజంగా బిజినెస్ జరుగుతుందో లేదో అన్నది ఇప్పటికిప్పుడు తేలే అంశం కాదు. ఫస్ట్ లుక్, తొలి టీజర్ విడుదలైతే గానీ, ఒక అంచనాలకు వచ్చే పరిస్థితి లేదు. రెగ్యులర్ కమర్షియల్ ఎంటర్టైనర్ గా తెరకెక్కుతోన్న ఈ సినిమా ప్రీ రిలీజ్ అంత జరిగితే… అది మరో సంచలనమే!
