యువదర్శకుడు తరుణ్ భాస్కర్ హీరోగా నటిస్తున్న మీకు మాత్రమే చెప్తా వచ్చే నెల 1న విడుదలకు సిద్ధం అవుతుంది. తరుణ్ విక్టరీ వెంకటేష్ తదుపరి చిత్రానికి దర్శకత్వం వహిస్తాడు. గుర్రపు స్వారీ నేపథ్యంలో జరిగే ఈ సినిమా సంక్రాంతికి ముహూర్తం జరుపుకుంటుంది. వచ్చే ఏడాది దసరాకు విడుదలకు ప్లాన్ చేస్తున్నారు.
అయితే ఈ లోగా ఈ యువదర్శకుడు యంగ్ టైగర్ ఎన్టీఆర్ కు ఒక లైన్ వినిపించాడట. అది ఎన్టీఆర్ కు కూడా బాగా నచ్చిందట. “లైన్ చెప్పా ఆయనకు కూడా నచ్చింది. అయితే పూర్తిగా డెవలప్ చెయ్యడానికి రెండు మూడు నెలలు పడుతుంది. ఆ తరువాత ఆయన ఏమని తేలుస్తారో చూడాలి,” అని తరుణ్ ఒక ఇంటర్వ్యూలో చెప్పుకొచ్చాడు.
ఎన్టీఆర్ ప్రస్తుతం రాజమౌళి ఆర్ఆర్ఆర్ సినిమాలో నటిస్తున్నాడు. ఇది రామ్ చరణ్ తో ఒక మల్టీ స్టారర్ చిత్రం. దీనిలో ఎన్టీఆర్ కొమరం భీమ్ గా కనిపించబోతున్నాడు. ఈ సినిమా 2020 రెండో భాగంలో గానీ విడుదల అవ్వదు. ఇంకా ఆలస్యమైనా చెప్పలేం. ఈలోగా ఎన్టీఆర్ ఎటువంటి కొత్త ప్రాజెక్టులు సైన్ చెయ్యడం లేదు.
అయితే తరుణ్ తో సినిమా పడితే మాత్రం అది మంచి ఇమేజ్ మేక్ ఓవర్ సినిమా అవుతుంది. దీనితో ఎన్టీఆర్ అభిమానులు ఈ చిత్రం పై ఎన్టీఆర్ నిర్ణయం కోసం ఆసక్తిగా ఎదురు చూస్తున్నారు. రాజమౌళి తరువాత తరుణ్ తో సినిమా చేస్తే అభిమానుల అంచనాలు కూడా దానికి తగ్గట్టుగా ఉంటాయి.
