మాజీ వైసీపీ ఎంపీ విజయసాయి రెడ్డి కొద్ది సేపటి క్రితం విజయవాడలో తన కొత్త పార్టీ ప్రకటించారు. తన కొత్త పార్టీ పేరు పరివర్తన రాజనీతి పార్టీ (పీఆర్‌పీ) అని ప్రకటించారు. ఈ సందర్భంగా తన పార్టీ జెండాను ఆవిష్కరించారు. పార్టీ జెండాలో పైన కాషాయం, కింద భాగంలో తెలుపు రంగులు కలిగి మధ్యలో ధర్మచక్రం ఉంది.
ఈ సందర్భంగా ఆయన ప్రసంగంలో చేసిన ఆసక్తికరమైన వ్యాఖ్యలు
· ఎప్పటికీ రెండు కుటుంబాలే రాష్ట్రాన్ని, ప్రజలను పాలించాలా?వారి వారసులే ముఖ్యమంత్రి, మంత్రి పదవులు చేపట్టాలా?
· నేను ఈ పార్టీతో ఆంధ్రప్రదేశ్‌ రాష్ట్రాన్ని మార్చేస్తానని చెప్పడం లేదు. ఈ ఐదు కోట్ల మంది ప్రజల్లో నుంచే నాయకులను తయారుచేసి వారికే ఈ బాధ్యత అప్పగిస్తాను. పీఆర్‌పీలో రాజకీయ వారసత్వం ఉండదు. బడుగు, బలహీన వర్గాల వారికి అధికారంలో భాగస్వామ్యం కల్పించడమే నా లక్ష్యం.
· అధికార పార్టీ ఎంతసేపు గొప్పలు చెప్పుకుంటుంటే, ప్రతిపక్షపార్టీ అహంకారంతో రాజకీయాలతో కాలక్షేపం చేస్తోంది.
· భారీ మెజార్టీతో అధికారంలోకి వచ్చిన వైసీపీ 11 సీట్లకు ఎందుకు పడిపోయిందంటే, జగన్మోహన్ రెడ్డి అహంకారం వల్లనే.
· నా స్వీయ శక్తి సామర్థ్యాలతోనే ఎంపీ స్థాయికి ఎదిగాను తప్ప ఎవరి దయాదాక్షిణ్యాలతో ఈ స్థాయికి ఎదగలేదు.
· వైసీపీ నిర్మాణంలో నేను కీలక పాత్ర వహించాను. కానీ అనేక అవమానాలు ఎదుర్కొని బయటకు వెళ్ళేలా చేశారు.
· నేను పార్టీ పెడుతున్నానని ప్రకటించగానే అటు టీడీపీ, ఇటు వైసీపీ నాపై దుష్ప్రచారం మొదలుపెట్టేశాయి. కానీ నేను ఆ దేవుడిపై ప్రమాణం చేసి చెప్తున్నా… నేను ఎవరికీ బీ టీమ్‌ కాదు. నేను ఎవరు వదిలిన బాణాన్ని కాదు.
ఈ సందర్భంగా విజయసాయిరెడ్డి సీఎం చంద్రబాబు నాయుడు, వైసీపీ అధినేత జగన్మోహన్ రెడ్డి ఇద్దరిపై తీవ్ర విమర్శలు చేశారు. వారిద్దరి వలన రాష్ట్రానికి నష్టమే తప్ప లాభం లేదని తేల్చి పడేశారు. కనుకనే తాను ప్రజల కోసం ఈ పీఆర్‌పీని స్థాపించానని విజయసాయి రెడ్డి చెప్పారు.
ఆయన ఏడాది పాటు రాజకీయ సన్యాసం చేసి పరివర్తన చెందితే అందరూ హర్షించేవారు. కానీ ఈ రాజకీయ పార్టీ కోసం ఏర్పాట్లు చేసుకునేందుకే ఏడాది గ్యాప్ తీసుకున్నారని స్పష్టమవుతోంది.
తాను వైసీపీలో ఉన్నప్పుడు అనేక కుట్రలు చేసి టీడీపీ-బీజేపీలను విడగొట్టానని ఇటీవలే ఆయన స్వయంగా చెప్పుకున్నారు. ఇక 11 అక్రమాస్తుల కేసులలో ఏ-2గా, ఏపీ మద్యం కుంభకోణంలో ఆరోపణలు ఎదుర్కొంటున్న విజయసాయిరెడ్డి, నాకు ముఖ్యమంత్రి పదవి అక్కరలేదు. రాష్ట్రానికి మేలు చేసేందుకే వచ్చానని, రాజకీయాలలో పరివర్తన తెస్తానని చెప్తే నమ్మశక్యంగా ఉందా?
