వాల్ పోస్టర్ సినిమాస్ పేరుతో నాని నిర్మాత గా మొదలైన హిట్ సిరీస్ ఇప్పటికే రెండు కేసులను విజయవంతంగా ఛేదించి ప్రేక్షకుల మన్ననలను పొందింది. ఇక ఇప్పుడు నాని హీరోగా తెరకెక్కిన హిట్ 3 మే1 న థియేటర్లలోకి రానుంది.
ఈ నేపథ్యంలో ఈ రోజు విశాఖలో విడుదలైన హిట్ – 3 ట్రైలర్ నాని మేకోవర్ ను స్పష్టంగా చూపించింది. గతంలో ఎన్నడూ చూడని విధంగా నాని తన వైలెన్స్ పర్ఫార్మెన్స్ తో హిట్ – 3 ట్రైలర్ ను పూర్తిగా రక్తపాతంగా మార్చారు.
ఈ మధ్యకాలంలో సినీ ఇండస్ట్రీ కి హిట్ ఫార్ములా గా మారిన బ్లడ్ బాత్ కాన్సెప్ట్ నాని కూడా తాకిందా అన్నట్టుగా ట్రైలర్ చివరిలో నాని పూర్తిగా రక్తంతో తడిచిపోయారు. విశ్వక్ సేన్ హిట్, అడవి శేషు హిట్ -2 ప్రేక్షకుల అటెంషన్ ను తన వైపు తిప్పుకోగలిగితే నాని హిట్ -3 ట్రైలర్ తోనే సినిమాలోని వైలెన్స్ ఎలా ఉండబోతుందో అనేది చూపించింది.
ఒక పవర్ ఫుల్ పోలీస్ ఆఫీసర్ పాత్రలో కనిపిస్తున్న నాని,.. సార్, క్రిమినల్స్ ఉంటే భూమి మీద 10 ఫీట్ సెల్లో ఉండాలి, లేకుంటే భూమి కింద 6 ఫీట్ గోతిలో ఉండాలి అంటూ చెప్పిన డైలాగ్ నాని పాత్రలోని ఆవేశాన్ని చూపించింది. అలాగే ఈ హిట్- 3 కేసు 9 నెలల చిన్నారి మిస్సింగ్ తో మొదలై మరెన్ని మలుపులు తిరగనుందో అన్నట్టుగా ట్రైలర్ కట్ కనిపిస్తుంది.
శైలేష్ కొలను దర్శకత్వంలో తెరకెక్కిన ఈ చిత్రంలో కెజిఎఫ్ శ్రీనిధి శెట్టి నానితో జత కట్టగా, రావు రమేష్, బ్రహ్మాజీ, సూర్య శ్రీనివాస్ ప్రధాన పాత్రలలో నటించారు.ఇప్పటి వరకు సాఫ్ట్ మ్యూజిక్ తో అలరించిన మిక్కీ జే మేయర్ ఈ చిత్రానికి సంగీతం అందిస్తున్నారు. అయితే ట్రయిలర్ లో వచ్చిన బీజీఎమ్ పూర్తిగా ఆకట్టుకుందనే చెప్పాలి.
గత నెల 14 న వాల్ పోస్టర్ సినిమాస్ బ్యానేర్ లో వచ్చిన కోర్ట్ మూవీ నిర్మాతగా నానికి కాసుల వర్షాన్ని కురిపించడం తో పాటుగా మంచి అభిరుచి గల నిర్మాతగా నానికి ప్రశంసలు తెచ్చిపెట్టింది. ఇక ఇపుడు ఇదే బ్యానేర్ తో వస్తున్న నాని హిట్ – 3 ప్రేక్షకులను కేసులో ఏ మేరకు ఇన్వాల్వ్ చేయగలుగుతుందో చూడాలి.
అయితే ఈ హిట్ సిరీస్ కొనసాగింపుగా హిట్ – 4 లో తమిళ సూపర్ స్టార్ కార్తీ నటించబోతున్నారంటూ సోషల్ మీడియాలో పెద్ద ఎత్తున ప్రచారం కూడా జరిగింది. మరి ఈ హిట్ సిరీస్ రానున్న రోజులలో ఇంకెన్ని విధ్వంశకర కేసుల ఛేదనతో ప్రేక్ల్షకుల ముందుకొస్తుందో, ఇంకెంత వైలెన్స్ ను పరిచయం చేస్తుందో చూడాలి.
