“తూర్పు దిక్కు ఎరుపెక్కి… మార్పు కొరకు ప్రశ్నించే హక్కేరా… ఈ జనసేన…” అంటూ పార్టీ ఆవిర్భావ సభలో ఆవిష్కరించిన ‘జనసేన’ థీమ్ సాంగ్ ఒక్క పవన్ అభిమానుల్లోనే కాదు, సాధారణ ప్రజల్లో కూడా మంచి ఆదరణ పొందింది. అంతేకాకుండా పార్టీ బహిరంగ సభలలో కూడా అభిమానులకు, కార్యకర్తలకు ఈ పాట మంచి ఉత్సాహాన్ని పంచడంలో విజయవంతం అయ్యింది. ఈ పాట తర్వాత ‘జనసేన’కు చాలా పాటలు విడుదలయ్యాయి గానీ, ఒక్క పాట కూడాఆదరణకు నోచుకోలేదు.
ఈ క్రమంలోనే ‘జనసేన’ జెండా పాట అంటూ తాజాగా మరో పాటను విడుదల చేసారు. అనంత శ్రీరామ్ సాహిత్యం అందించిన ఈ పాటకు అనూప్ రూబెన్స్ సంగీతం అందించారు. సంగీత, సాహిత్య పరంగా… రెండు రకాలుగా ఏ మాత్రం ఆకట్టుకోలేని పాటగా నిలవడం విశేషం. ముఖ్యంగా జనసైనికులకు కావాల్సిన ఊపును ఈ పాట ఏ మాత్రం పంచలేకపోయింది. దీంతో మరోసారి నిరుత్సాహపడడం పవర్ స్టార్ అభిమానుల వంతవుతోంది. సినీ రంగం నుండి వచ్చారు గనుక, ‘జనసేన’ పాటలు ప్రజల ఆలోచనలకు, పార్టీ ఆశయాలను ప్రతిబింబించే విధంగా ఉంటాయని భావిస్తే, అందుకు విరుద్ధంగా పేలవంగా ఉండడం ఊహించినది కాదు.
