‘టెంపర్, నాన్నకు ప్రేమతో’ సినిమాలతో మాంచి ఊపు మీద ఉన్న జూనియర్ ఎన్టీఆర్, తాజాగా నటిస్తున్న చిత్రం ‘జనతా గ్యారేజ్.’ కొరటాల శివ దర్శకత్వంలో మైత్రీ మూవీస్ నిర్మిస్తున్న ఈ చిత్రం ప్రారంభానికి ముందే భారీ అంచనాలను ఏర్పరచుకుంది. ఇప్పటికే కొన్ని ఏరియాలలో రికార్డు స్థాయి బిజినెస్ జరుపుకున్న ఈ సినిమా కోసం కోట్లు ఖర్చు పెట్టి సారధి స్టూడియోలో ఓ భారీ సెట్ ను కూడా వేసారు.
ఇంతటి ప్రతిష్టాత్మకమైన ప్రాజెక్ట్ లో జూనియర్ ఎన్టీఆర్ లుక్ ఎలా ఉంటుందా? అన్న ఆతృత అభిమానుల్లో వ్యక్తమవ్వడం సహజమే. అలాంటి వారి కోసమే తాజాగా సోషల్ మీడియాలో ఓ లుక్ హల్చల్ చేస్తోంది. గడ్డంతో ఎటువంటి హంగామా లేనటువంటి ఓ సాదా సీదా చొక్కాతో దర్శనమిస్తున్న జూనియర్ ఎన్టీఆర్ లుక్ ఫ్యాన్స్ ను ఆకట్టుకుంటోంది.
చిత్ర షూటింగ్ లో భాగంగా అక్కడికి వచ్చిన అభిమానులతో కలిసి ఫోటోలు దిగిన సందర్భంలో జూనియర్ ఎన్టీఆర్ లుక్ బయటకు వచ్చింది. ‘శ్రీమంతుడు’ మాదిరే ‘జనతా గ్యారేజ్’ స్క్రిప్ట్ కూడా చాలా అద్భుతంగా వచ్చిందన్న టాక్ ఇండస్ట్రీ వర్గాల్లో హల్చల్ చేస్తుండడంతో ఇటు అభిమానుల్లోనూ, అటు ట్రేడ్ వర్గాల్లోనూ ‘జనతా గ్యారేజ్’పై భారీ అంచనాలు ఉన్నాయి. ఆగష్టు 12వ తేదీన వీటన్నింటికి సమాధానం లభించనుంది.
