యూ ట్యూబ్ లో ఎప్పటికప్పుడు సరికొత్త రికార్డులను సృష్టించడం పవర్ స్టార్ పవన్ కళ్యాణ్ అభిమానుల సొంతం. పవన్ నటించిన సినిమా టీజర్ నుండి ట్రైలర్ వరకు తెగ హంగామా చేసే అభిమానులు, ఈ సారి పవన్ సినిమా కాకపోయినా సత్తా చాటారు. ఆదివారం నాడు పవన్ కళ్యాణ్ చేతుల మీదుగా ఆడియో విడుదల అయిన “సప్తగిరి ఎక్స్ ప్రెస్” సినిమా ట్రైలర్ 24 గంటల్లోనే 1 మిలియన్ క్లిక్స్ ను అందుకోవడం ఊహించినది కాదు.
సప్తగిరి వంటి ఒక సాధారణ కమెడియన్ సినిమా ట్రైలర్ 10 లక్షల క్లిక్స్ ను ఒక్క రోజులో అందుకుందంటే అది సాధారణ విషయం కాదు. పవన్ స్టార్ సినిమా ట్రైలర్ ను చూసినంతగా ఈ సినిమా ట్రైలర్ ను అభిమానులు ఎగబడి చూసినట్లుగా అర్ధమవుతోంది. నిజానికి పవన్ నటించిన గత చిత్రం “సర్దార్ గబ్బర్ సింగ్” ట్రైలర్ కూడా ఒక్క రోజులో 1 మిలియన్ క్లిక్స్ ను అందుకోవడంలో విఫలమైంది.
ఈ తాజా పరిణామాలతో “సప్తగిరి ఎక్స్ ప్రెస్”పై ప్రేక్షకుల్లో ఎంతటి అంచనాలు నెలకొన్నాయో అర్ధమవుతోంది. మరి ఈ అంచనాలను సప్తగిరి ఎంతవరకు అందుకుంటాడో గానీ, ‘సప్తగిరి ఎక్స్ ప్రెస్’ ఓపెనింగ్స్ విషయంలో ఏ మాత్రం డోకా లేదని పవన్ అభిమానులు పరోక్షంగా చెప్పకనే చెప్తున్నారు. దీంతో కమర్షియల్ గా ‘సప్తగిరి ఎక్స్ ప్రెస్’ విజయాన్ని చవిచూడడం ఖాయంగానే కనపడుతోంది.
