బాక్సాఫీస్ వద్ద విజయ్ దేవరకొండ వీరవిహారం కొనసాగుతోంది. ఏపీ, తెలంగాణాలతో పాటు తమిళనాడు వంటి ఇతర రాష్ట్రాలలోనూ దుమ్ముదులుపుతోన్న “గీత గోవిందం,” యుఎస్ లో 2 మిలియన్ మార్క్ ను టచ్ చేసింది. దీంతో 2 మిలియన్ క్లబ్ లోకి ప్రవేశించిన ప్రభాస్, మహేష్, జూనియర్ ఎన్టీఆర్, పవన్ కళ్యాణ్, చిరంజీవి, రామ్ చరణ్ ల సరసన నిలిచాడు విజయ్ దేవరకొండ.
[m9ad]
అయితే యుఎస్ బాక్సాఫీస్ వద్ద “గీత గోవిందం” ఎంతవరకు వసూలు చేస్తుంది? అన్నది ఆసక్తికరంగా మారింది. వచ్చేవారంలో కూడా బరిలో చెప్పుకోదగ్గ సినిమాలు లేకపోవడంతో, “గీత గోవిందం”దే పండగ అంతా! కానీ యుఎస్ కు వచ్చేసరికి 2 వారాలు గడిచిందంటే, దాదాపుగా ఆ సినిమా తుదిదశకు చేరుకున్నట్లే. కానీ ‘గీత గోవిందం’ పరిస్థితి అంత దారుణంగా అయితే లేదు, మరో వారం వరకు యుఎస్ లో విజయవంతంగా ప్రదర్శితం కావచ్చు.
ఇప్పటివరకు అయితే 2 మిలియన్స్ వసూలు చేసింది, అలాగే రేపో మాపో జూనియర్ ఎన్టీఆర్ ‘నాన్నకు ప్రేమతో,’ పవన్ కళ్యాణ్ ‘అజ్ఞాతవాసి’ సినిమాలను అధిగమించడం తధ్యం. అయితే ఈ క్రమంలో మెగాస్టార్ చిరంజీవి “ఖైదీ నంబర్ 150” సాధించిన 2.4 మిలియన్ డాలర్స్ ను అందుకుంటాడా? లేదా? అన్నది ఆసక్తికరంగా మారింది. ట్రేడ్ వర్గాల ప్రకారం “గీత గోవిందం” 2.2 మిలియన్ డాలర్స్ వరకు కొల్లగొట్టవచ్చని అంచనా వేస్తున్నారు.
