యంగ్ రెబల్ స్టార్ ప్రభాస్ పుట్టినరోజును అభిమానులు సోషల్ మీడియాలో అర్ధరాత్రి 12 గంటల నుండే జరుపుకుంటూ ట్విట్టర్ లో ట్రెండ్ చేస్తోన్న దరిమిలా… బ్రేకింగ్ న్యూస్ అంటూ ఓ వ్యక్తి ప్రభాస్ పుట్టినరోజు గురించి ఓ వార్తను అందించారు. సినిమా విడుదలకు ముందు ‘సూపర్’ అంటూ ప్రతిసారి రివ్యూలు ఇచ్చే సదరు వ్యక్తి, ఇటీవల ప్రభాస్ – అనుష్కకు త్వరలోనే పెళ్లి జరగబోతోదంటూ సోషల్ మీడియాలో హంగామా చేసారు.
తన ఇంస్టాగ్రామ్ ఖాతాలో ఫాలోయర్స్ ను పెంచుకోవడానికి గానూ ఇలాంటి చీప్ పబ్లిసిటీలు చేయడం అలవాటుగా మారిన సదరు వ్యక్తి, తాజాగా ప్రభాస్ పుట్టినరోజు సందర్భంగా అనుష్క – ప్రభాస్ ల గురించి మరో వార్త రాసుకొచ్చారు. ఈ పుట్టినరోజును ‘లవ్ బర్డ్స్’ ఇద్దరూ ప్రభాస్ – అనుష్కలు కలిసి జరుపుకుంటున్నారని చెప్తూ… మరింత అత్యుత్సాహాన్ని ప్రదర్శించారు.
ఇప్పటికే చాలా సందర్భాలలో వీరిద్దరి రిలేషన్స్ పై చాలా వార్తలు పుట్టుకొచ్చాయి. అలాగే వివిధ సందర్భాలలో దీనిపై వీరిద్దరూ కూడా వివరణ ఇచ్చుకున్నారు. ఇటీవల మరోసారి ప్రభాస్ కూడా ఈ విషయాన్ని ఖండించారు. ఓ పక్కన ఇలా చెప్తున్నప్పటికీ, మరో పక్కన ‘తాను పట్టిన కుందేలుకు మూడే కాళ్ళు’ అన్న చందంగా సదరు వ్యక్తి వ్యవహరిస్తూ సోషల్ మీడియాలో హంగామా చేయడంతో ‘యంగ్ రెబల్ స్టార్’ ఫ్యాన్స్ ఆగ్రహానికి గురవుతున్నారు.
