మెగా అభిమానులు ఎంతగానో ఎదురు చూస్తున్న మెగాస్టార్ చిరంజీవి సినిమా సర్వహంగులతో సిద్ధమవుతోంది. ఇప్పటికే శరవేగంగా చిత్రీకరణ జరుపుకుంటోన్న ఈ సినిమా షూటింగ్, ప్రస్తుతం యాక్షన్ సన్నివేశాలలో నిమగ్నమై ఉంది. తాజాగా ఈ సినిమాకు సంబంధించిన ఓ సమాచారం మెగా అభిమానుల్లో ఉత్సుకతను పెంచుతోంది. అదే… సూపర్ స్టార్ అమితాబ్ బచ్చన్ అతిథి పాత్ర పోషిస్తున్నాడనే టాక్.
అవును… ‘కింగ్’ నాగార్జున ‘మనం’ సినిమాలో కొద్ది సెకన్ల పాటు దర్శనమిచ్చిన అమితాబ్, తాజాగా చిరంజీవి సినిమాలోనూ ఓ అతిథి పాత్రకు గ్రీన్ సిగ్నల్ ఇచ్చినట్లుగా ట్రేడ్ వర్గాలలో హల్చల్ చేస్తోన్న సమాచారం. అయితే ఇందులో వాస్తవం ఎంత ఉందో గానీ, మెగా ఫ్యాన్స్ మాత్రం అధికారిక సమాచారం కోసం వేచిచూస్తున్నారు. గతంలో ఓ వేడుకలో… ‘మీరు సినిమా చేస్తే నేను కూడా ఒక పాత్ర పోషిస్తానని’ స్వయంగా అమితాబ్ వ్యాఖ్యానించిన విషయం తెలిసిందే.
అయితే దీనిని బేస్ చేసుకుని ఈ వార్త పుట్టుకొచ్చిందో ఏమో గానీ, మరోసారి మెగాస్టార్ 150వ సినిమా హాట్ టాపిక్ అయ్యింది. ఇప్పటికే ప్రభుదేవా, లారెన్స్ ల పాటల కొరియోగ్రఫీతో మెగా ‘స్టెప్పులు’ ఓ రేంజ్ లో ఉంటాయని ఆశిస్తున్న అభిమానులకు, అమితాబ్ కాంభినేషన్ కూడా జోడయితే, ఈ సినిమా మరింత క్రేజీగా మారిపోవడం తధ్యం. ఇలా అభిమానుల కోసం మరిన్ని ‘స్పెషల్స్’తో సిద్ధం చేస్తున్న ఈ సినిమా ఫస్ట్ లుక్ ఈ నెల 22వ తేదీన మెగాస్టార్ పుట్టినరోజు కానుకగా విడుదల కానుంది. ప్రస్తుతం మెగా అభిమానుల చూపులన్నీ ఆ తేదీ పైనే..!
