ప్రస్తుతం విడుదలవుతున్న సినిమాల ఆల్బమ్స్ లో ఒకటి, రెండు పాటలు వినసొంపుగా ఉండడమే గగనంగా మారిపోయిన సంగతి సంగీత ప్రియులకు తెలిసిందే. అంతకుముందు కనీసం పెద్ద సినిమాలలో అయినా, కాస్త శ్రోతల అభిరుచికి తగ్గట్లుగా పాటలు ఉండేవి. కానీ ప్రస్తుతం పెద్ద సినిమాల ఆడియోలు కూడా డిజాస్టర్లుగా మారుతున్న తరుణంలో… “మహానుభావుడు” సినిమాకు థమన్ అద్భుతమైన స్వరాలను సమకూర్చారు.
ఇందులో మొత్తం ఆరు పాటలు ఉండగా, మొత్తం ఆరు పాటలు కూడా బాగుండడం చెప్పుకోదగ్గ విషయం. అందులో కూడా ‘భామలు భామలు…’ అంటూ సాగిన పాట మాస్ కు విపరీతంగా ఎక్కేసింది. కృష్ణకాంత్ అందించిన సాహిత్యం ఈ పాటకు ప్లస్ పాయింట్ గా మారగా, దానికి తగిన విధంగా మాంచి హుషారైన బీట్ ను అందించాడు థమన్. ఈ పాటకు నకాష్ అజీజ్ హుషారైన స్వరం తోడవ్వడంతో చార్ట్ బస్టర్స్ లో నిలబెట్టింది.
మిగిలిన పాటలు కూడా అదిరిపోయే రేంజ్ లో ఉండగా, ఆడవారిని టీజ్ చేస్తూ సాగిన ఈ పాట మాత్రం అన్ని వర్గాలకు బాగా చేరువ అయ్యింది. ఇటీవల కాలంలో ఓ సినిమాలో అన్ని పాటలు బాగుండడం బహుశా “మహానుభావుడు” సినిమాతోనే తీరిందని చెప్పాలి. మరి ఈ బ్లాక్ బస్టర్ సాంగ్స్ “మహానుభావుడు” సినిమాకు బాక్సాఫీస్ వద్ద ఎంతవరకు దోహదం చేస్తాయో, ఈ నెల 29వ తేదీన తేలనుంది.
