ఇటీవలే ముగిసిన భారత్-ఆసీస్ వన్-డే పోరు లో భారత్ 2-1 తో సిరీస్ ను చేజార్చుకున్న విషయం తెలిసిందే. కానీ, ఈ సిరీస్ ఓటమిని మరిచిపోయేలా చేసింది మాత్రం 3వ వన్-డే లో రో-కో ల బ్యాటింగ్ అనే చెప్పాలి.
సిరీస్ ముగిసేనాటికి సిరీస్ ను గెలవలేకపోయామే అనే బాధ నుంచి కాస్త ఉపశమనం దక్కింది అంటే అది ఆ ఇద్దరి పార్టనర్-షిప్ ఇచ్చిన రిలీఫ్ అనే చెప్పాలి.
ఇటు చూస్కుంటే రోహిత్ శర్మ ఈ సిరీస్ లో ఒక హాఫ్ సెంచరీ, ఒక సెంచరీ తో చెలరేగి మ్యాన్ అఫ్ ది సిరీస్ గా నిలిచాడు. అలాగే, మ్యాచ్ ముగిసిన 4 రోజులకు ఐసీసీ తమ బెస్ట్ బ్యాటర్ ర్యాంకింగ్స్ ను ఇవాళ ఉదయం విడుదల చేసింది. అందరు ఊహించినట్టే 38 ఏళ్ళ వయసులో రోహిత్ శర్మ నెంబర్-1 వన్-డే బ్యాటర్ గా అవతారమెత్తాడు.
రోహిత్ శర్మ టెస్ట్ మరియు టి-20 లో ఎటువంటి ప్రదర్శన ఇచ్చినా, వన్-డేల్లో రోహిత్ శర్మ ఒక విధ్వంసం అని చెప్పచు. ప్రపంచంలో ఎవ్వరికి సాధ్యమవ్వని రీతిలో ఏకంగా 3 డబుల్ సెంచరీలు బాదడమేకాక, క్రికెట్ చరిత్రలోనే ఒకే వన్-డే ఇన్నింగ్స్ లో హైయెస్ట్ స్కోర్ అయిన ‘264’ రికార్డ్ సైతం హిట్-మ్యాన్ పేరిట ఉంది.
వన్-డే ఇంటర్నేషన్ లలో తన పేరిట 33 శతకాలున్నాయి. రోహిత్ శర్మ ఓపెనర్ గా ప్రోమోట్ అయిన వేళ నుండి వన్-డే లలో శివ తాండవం చేస్తున్నాడు. మరి వన్-డే ల్లో ఇంత భీకరమైన ట్రాక్ రికార్డు ఉన్న రోహిత్ శర్మ ఒక్కసారి కూడా నెంబర్-1 బ్యాటర్ గా నిలవలేదా అంటే.. లేదు అనే చెప్పాలి. పలుసార్లు నెంబర్-2 వరుకు వెళ్లినా, టాప్ స్పాట్ కు మాత్రం చేరుకోలేకపోయారు.
2019 ఇంగ్లాండ్ లో జరిగిన వరల్డ్-కప్ లో ఏకంగా 5 సెంచరీలు కొట్టి, ఎవ్వరు కలలో కూడా ఊహించని రికార్డు ను తన పేరిట లిఖించుకున్నాడు రోహిత్. ఆ టోర్నీ లో 648 పరుగులు చేసి క్రికెట్ గాడ్ సచిన్ రికార్డుకు ఎసరు పెట్టాడు. మరి 2023 లో సొంత గ్రౌండ్లలో ఆడిన వరల్డ్-కప్ లో కెప్టెన్ గా జట్టును నడిపించటమే కాకుండా, బ్యాటర్ గా జట్టుకు శుభారంభాలు ఇస్తూ ప్రతి మ్యాచ్లోనూ ఆకర్షించాడు.
అయితే మరి ఇన్ని సానుకూల పరిస్థితుల్లో కూడా రోహిత్ నెంబర్-1 వన్-డే బ్యాటర్ గా నిలవలేదు. మరి 2025 ఛాంపియన్స్ ట్రోఫీ తరువాత వన్-డే జట్టులో కూడా తన చోటు ప్రశ్నార్ధకం అయిన వేళ, ఎన్నో ప్రతికూల పరిస్థితుల్లో, అది కూడా ఆస్ట్రేలియా గడ్డ పై ఆడిన సిరీస్ లో ‘మ్యాన్ అఫ్ ది సిరీస్’ అవార్డును అందుకుని,
అటు పిమ్మటే నెంబర్-1 బ్యాటర్ గా నిలవటం, హిట్ మాన్ అభిమానులకే కాదు సగటు భారత క్రికెట్ అభిమానికి సైతం ఆనందాన్ని అందిస్తుంది. కోహ్లీ డైలాగ్ అయినా ‘గాడ్స్ ప్లాన్ బేబీ’ అంటూ సోషల్ మీడియా వేదిక తమ ఆనందాన్ని వ్యక్తపరుస్తున్నారు రోహిత్ అభిమానులు.
