“పటాస్… సుప్రీమ్…” వంటి సినిమాలతో బ్యాక్ టు బ్యాక్ కమర్షియల్ హిట్స్ ను సొంతం చేసుకుని, ట్రేడ్ వర్గాల్లో పక్కా కమర్షియల్ డైరెక్టర్ గా క్రేజ్ తెచ్చుకున్న అనిల్ రావిపూడి నుండి “రాజా ది గ్రేట్” చిత్రం రాబోతోంది. ఇటీవల విడుదలైన ఈ సినిమా టీజర్ కు ఫుల్ పాజిటివ్ రెస్పాన్స్ లభించగా, తాజాగా ఈ సినిమాకు సంబంధించి ఓ ఆసక్తికరమైన అంశం సోషల్ మీడియాలో చక్కర్లు కొడుతోంది.
ఈ సినిమా కోసం ఒక భారీ యాక్షన్ ఎపిసోడ్ ను తెరకెక్కించడానికి చిత్ర యూనిట్ సన్నాహాలు చేస్తోంది. హీరో రవితేజ మరియు ఫైటర్స్ పై చిత్రీకరించనున్న ఈ యాక్షన్ సన్నివేశాన్ని ట్రైన్ లో షూట్ చేయబోతున్నారట. ‘రాయఘర్’లో ఈ ఎపిసోడ్ ను చిత్రీకరించడం కోసం చిత్ర బృందం ఇప్పటికే అక్కడికి చేరుకుంది. రైలు నేపధ్యంలో సాగనున్న ఈ యాక్షన్ సీన్ “రాజా ది గ్రేట్”కే హైలైట్ గా నిలవనుందన్నది లేటెస్ట్ న్యూస్.
యాక్షన్ సన్నివేశాలను రూపకల్పన చేయడంలో అనిల్ రావిపూడి ప్రత్యేకత, ఈ ఫైట్ లో ఖచ్చితంగా కనిపిస్తుందని బలంగా వినపడుతోన్న మాట. ‘పటాస్’లో అమ్మల చేత యాక్షన్ సీన్స్ చేయించిన అనిల్, ‘సుప్రీమ్’లో హ్యాండీక్యాప్డ్ వాళ్ళ చేత వినూత్నంగా చేయించిన విషయం తెలిసిందే. ఈ రెండూ కూడా ఆయా సినిమాలలో హైలైట్ అయ్యాయి. ‘దీపావళి’ కానుకగా అక్టోబర్ 12న విడుదల కానున్న ఈ సినిమాలో ఈ ట్రైన్ ఫైట్ కూడా అదే రేంజ్ లో రానుందని తెలుస్తోంది.
