మురుగదాస్ దర్శకత్వంలో ప్రిన్స్ మహేష్ బాబు హీరోగా తెరకెక్కుతోన్న సినిమాకు సంబంధించి ఓ కీలక వార్త బయటకు వచ్చింది. ‘అఖిరా’ సినిమా సక్సెస్ లో ఉన్న మురుగదాస్, తన తదుపరి ప్రాజెక్ట్ అయిన మహేష్ సినిమా గురించి మీడియాకు సమాచారం ఇచ్చారు. ఇందులో భాగంగా ఈ సినిమా విడుదల సమయాన్ని ప్రకటించారు. 2017 ఏప్రిల్ లో ఈ సినిమా విడుదలను ప్లాన్ చేస్తున్నట్లుగా తెలిపారు మురుగదాస్.
యాక్షన్ థ్రిల్లర్ గా రూపుదిద్దుకుంటున్న ఈ సినిమా షూటింగ్ మొత్తాన్ని డిసెంబర్ నాటికి పూర్తి చేస్తామని ప్రకటించిన మురుగదాస్, మరిన్ని వివరాలు ఇప్ప్పుడే చెప్పడం సమంజసం కాదని, ఒక్కసారి సినిమా పూర్తయిన తర్వాత చెప్తానని అన్నారు. తెలుగు, తమిళ భాషల్లో విడుదల కానున్న ఈ సినిమాను ఠాగూర్ మధు, ఎన్వీ ప్రసాద్ మరియు మరికొన్ని కార్పొరేట్ సంస్థలు నిర్మిస్తున్నాయి.
మురుగదాస్ చెప్పిన వివరాల ప్రకారం వచ్చే ఏడాది సమ్మర్ లో ఈ సినిమా విడుదల ఉంటుందని చెప్పవచ్చు. ఏప్రిల్ చివరలో ‘బాహుబలి 2’ విడుదల ఉండడంతో, ఆ సినిమాకు ముందుగానే విడుదల అవుతుందా? లేక ‘శ్రీమంతుడు’ మాదిరి వెనక్కి తగ్గి, మళ్ళీ బ్లాక్ బస్టర్ అందుకుంటాడా? అనేది వేచిచూడాలి. డిసెంబర్ నాటికి ఈ సినిమా షూటింగ్ పూర్తయితే, జనవరి నుండి ప్రిన్స్ కొత్త సినిమాను ప్రారంభిస్తారా? అనేది కూడా ఆసక్తికరంగా మారింది.
