గత కొన్ని రోజులుగా మీడియా వర్గాలలో చర్చకు దారి తీసిన ‘శ్రీనివాస కళ్యాణం’ సినిమా మొదలయ్యింది. నితిన్ హీరోగా రాశి ఖన్నా హీరోయిన్ గా ప్రారంభమైన ఈ సినిమా షూటింగ్ తొలి రోజునే మోషన్ పిక్చర్ ను విడుదల చేసి వినూత్నమైన ప్రమోషన్ ను స్టార్ట్ చేసారు. ‘శతమానం భవతి’ సినిమాతో సూపర్ హిట్ అందుకున్న వేగేశ్న సతీష్ దర్శకుడిగా దిల్ రాజు బ్యానర్ లో ఈ సినిమా నిర్మాణం జరగబోతోంది.
నిజానికి ఈ సబ్జెక్ట్ ను తొలుత జూనియర్ ఎన్టీఆర్ కు వినిపించారని, తారక్ కూడా కొన్ని మార్పులతో ఓకే చెప్పారన్న టాక్ రావడంతో ‘శ్రీనివాస కళ్యాణం’ టైటిల్ నెటిజన్లకు బాగా పరిచయం అయ్యింది. కానీ ఆ తర్వాత చేతులు మారుతూ చివరికి నితిన్ ఖాతాలో పడడం విశేషం. గతంలో ఇదే టైటిల్ తో వెంకటేష్ ఓ బంపర్ విక్టరీని అందుకున్న విషయం తెలిసిందే. ‘శతమానం భవతి’ మాదిరే ఈ ప్రాజెక్ట్ ను కూడా దిల్ రాజు చాలా వ్యక్తిగతంగా తీసుకున్నారని ట్రేడ్ వర్గాల టాక్.
ఇక విడుదల చేసిన మోషన్ పిక్చర్ లో నితిన్, రాశి ఖన్నాల జోడి కన్నులవిందుగా ఉంది. మెలోడీ స్వరాలను అద్భుతంగా అందించే మిక్కీ జే మేయర్ ఈ చిత్రానికి సంగీతం అందిస్తున్నారు. సమీర్ రెడ్డి ఫోటోగ్రఫీ అందిస్తుండగా, మరో హీరోయిన్ గా ‘ఎక్కడికి పోతావు చిన్నవాడా’ ఫేం నందిత శ్వేతా కీలక పాత్ర పోషిస్తోంది. ఇక దిల్ రాజు ఫ్యామిలీ ఎంటర్టైనర్స్ లో ఉండే ప్రకాష్ రాజ్ ఈ సినిమాలో కూడా ఓ ప్రధాన భూమిక పోషిస్తున్నారు.
