తాను చిత్ర అవకాశాలకు ప్రయత్నిస్తున్న వేళ, తమిళ హీరోగా పరిచయం కావాల్సి వుందని, కానీ ఆ అవకాశం తప్పిపోయిందని సూపర్ స్టార్ కృష్ణ ఓ ఆసక్తికర విషయాన్ని ‘స్పైడర్’ ప్రీ రిలీజ్ ఈవెంట్ సందర్భంగా అభిమానులతో పంచుకున్నారు. ఓ తెలుగు యువకుడిగా, మద్రాసులో అవకాశాల కోసం ప్రయత్నిస్తుంటే, తొలి అవకాశం తమిళ చిత్రంలోనే వచ్చిందని… అయితే తనకు తమిళం మాట్లాడటం రాకపోవడంతో అవకాశం చేజారిందని, ఎంతగా ప్రాక్టిస్ చేసినా, తనకు తమిళం ఒంటపట్టలేదని చెప్పిన సూపర్ స్టార్, ఆపై ఆదుర్తి సుబ్బారావు ‘తేనె మనసులు’ చిత్రం ద్వారా తనకు చాన్స్ ఇచ్చారని గుర్తు చేసుకున్నారు.
ఇప్పుడు మహేష్ ఎంతో అద్భుతంగా తమిళంలో డైలాగులు చెప్పడం తనకెంతో నచ్చిందని అన్నారు. మహేష్ తమిళ పరిశ్రమకు పరిచయం కావడం తనకు గర్వకారణమని చెప్పారు. ఒక్కో సినిమాకూ మహేష్ ఒక్కో మెట్టు ఎదుగుతున్నాడని కితాబిచ్చారు. దాదాపు 350కి పైగా సినిమాల్లో నటించిన తాను, అభిమానులు చూపే ఆదరణను మరువలేనని తెలిపారు. ఈ చిత్రం ట్రయిలర్ ఎంతో బాగుందని, చిత్రం విజయవంతం కావాలని కోరుకుంటున్నానని అన్నారు. కృష్ణ సతీమణి విజయనిర్మల మాట్లాడుతూ… చిత్ర బృందానికి అభినందనలు తెలిపారు.
