రాంగోపాల్ వర్మ తెరకెక్కించిన ‘వంగవీటి’ సినిమా విజయవాడలో హాట్ హాట్ వ్యాఖ్యలకు వేదిక అవుతోంది. ‘వంగవీటి’ సినిమాలో అభ్యంతరకమైన సన్నివేశాలు ఉన్నాయంటూ వ్యాఖ్యానించిన రాధా, వర్మపై సంచలన వ్యాఖ్యలకు తెరలేపారు. “రాంగోపాల్ వర్మకు డబ్బు అవసరమై తమను అడిగితే చందాలు వసూలు చేసి మరీ మొహాన కొట్టేవాళ్లమని, డబ్బు కోసం తన తండ్రి జీవితాన్ని కించపరిచారని, ఇందుకు ఆయన మూల్యం చెల్లించుకోక తప్పదని, తన తండ్రిని హత్య చేసిన వాళ్లు దర్జాగా బయట తిరుగుతున్నా కనిపించట్లేదా? వర్మ ఒక పకోడీ గాడు, ఒక పనికిమాలిన వెధవ” అంటూ తీవ్రస్థాయిలో మండిపడ్డారు.
దీనిపై వర్మ కూడా ఘాటుగానే స్పందించారు. రంగా గారి క్యారెక్టర్ని వక్రీకరించానన్నా రాధా కామెంట్స్ కు నా సమాధానం అంటూ…
1. రంగా గారు బోసిపళ్ళ మహాత్మా గాంధీ అని చూపించాలా?
2. మర్డర్ల మాట అటుంచి ఎవర్ని మొట్టికాయ కూడా కొట్టలేదని చూపించాలా?
3. మదర్ థెరిస్సా కన్నా సాత్వికుడు అని చూపించాలా?
4. అన్న దానాలు,ప్రజా సేవ తప్ప చీమకైనా హాని చెయ్యని గౌతమ బుద్దుడని చూపించాలా?
వాస్తవాలే చూపించాల్సిందన్న రాధా డిమాండ్లకి నా సమాధానం –
రంగా గారి గురించి, ఆయన భార్య గురించి, రంగా గారి అభిమానులు వినటానికి, చూడటానికి ఇష్టపడని డాక్యుమెంటేడ్ వాస్తవాలు నేను చాలా చాలా చూపించగలను. కానీ, రంగా గారి మీద వున్న గౌరవంతో అవి చూపించలేదు. దమ్ముండి… ఆ వాస్తవాలు ఏమిటని రాధా డిమాండ్ చేస్తే వాటన్నింటిని కుండ బద్దలు కొట్టినట్టు చెప్తా. నేను ముందు నుంచి చెప్తున్నది వంగవీటి సినిమా తియ్యడంలో నా ఉద్దేశ్యం ఆ జీవిత కథల ఆధారంగా అప్పుడు జరిగిన ఆ సంఘటనల వెనుక వాళ్ళ సున్నితమైన భావోద్వేగాలని చూపించడం మాత్రమే.
ఒరిజినల్ వంగవీటి రాధా, వంగవీటి రంగా గార్లలో ఉన్న గొప్పతనంలో ఈ రాధాకి 0.1% లేకపోవడం వలనే ఈ రాధా పరిస్థితి ఇలా వుంది. ఏమీ అర్ధం చేసుకోకుండా మాట్లాడుతున్నాడు. వంగవీటి సినిమా గురించి దుర్భుద్ది ఉన్న వాళ్ళు నా దురుద్దేశ్యం గురించి ఎంత అరిచి గీ పెట్టినా, పచ్చి నిజం ఏమిటంటే రంగా గారి మీద రాధాకి, రత్నకుమారి గారికి ఉన్న గౌరవం కన్నా ఎన్నో రెట్లు నాకెక్కువ గౌరవముంది. ఈ నిజం నిజాయితీగా గుండెల మీద చేయ్యేసుకున్న ప్రతి నిజమయిన రంగా అభిమానికి వాళ్ళ వాళ్ళ మనసుల్లో తెలుసు. నేను తీసిన వంగవీటి సినిమా కరెక్ట్ కాదనుకుంటే రాధాని “అసలు వంగవీటి” అని ఇంకో సినిమా తీసి లోకానికి చూపించుకోమనండి. ఇకపోతే నన్నేదో చేసేస్తానన్న రాధా ఇచ్చిన వార్నింగ్ కి నా కౌంటర్ వార్నింగ్.
బస్తీ మే సవాల్ — సెంటర్ నేను చెప్పను- టైం నువ్వు చెప్పొద్దు… అంటూ ముగించారు.
